Elordada túlekterdiń mektep bitirý keshi men sońǵy qońyraýǵa tyıym salynady
NUR-SULTAN. QazAqparat - Elordada karantın aıaqtalǵanǵa deıin túlekterdiń mektep bitirý keshine tyıym salynady. Bul týraly Nur-Sultan qalasynyń Bas memlekettik sanıtarlyq dárigeri Janna Pirálıevanyń búgingi qaýlysynda jazylǵan, dep habarlaıdy QazAqparat tilshisi.
Qujatqa sáıkes, túlekterdiń mektep bitirý keshi men sońǵy qońyraý ótkizýge, sondaı-aq kezekshi toptardyń jumysyn qospaǵanda, menshik nysanyna qaramastan balabaqsha qyzmetine tyıym salynady.
«Bilim berý uıymdaryn qashyqtyqtan oqytýdy, onyń ishinde bilimdi baǵalaýdyń barlyq túrlerin júrgizýdi qamtamasyz etý kerek», - delingen qujatta.
Eske sala ketsek, elimizde sońǵy qońyraý 25 mamyrda onlaın rejımde soǵylady.
