Elordada týǵanymdy maqtan etemin - Astana qurdasy
ORAL. QazAqparat - Kún sanap kórkeıip, ósip kele jatqan elordada týǵanymdy maqtan etemin. Bul týraly áskerı qyzmetshi Azamat Maǵzumov aıtyp berdi, dep habarlaıdy QazAqparat tilshisi.
QR Ulttyq ulany «Batys» óńirlik qolbasshylyǵyna qarasty 5517-áskerı bóliminde qyzmet etetin qatardaǵy jaýynger A.Maǵzumov Astanada ómirge keldi.
Keıin otbasymen birge Jezqazǵan qalasyna kóship, sondaǵy orta mektepti 2017 jyly bitirdi. 2017 jyldyń jeltoqsanynda áskerge alynǵan ol qazirgi kezde materıaldyq qamtamasyz etý rotasynda radıohımııalyq jáne bakterologııalyq qorǵaý jabdyǵyn jóndeý jónindegi maman retinde qyzmet etedi.
Azamatty «segiz qyrly, bir syrly» deýge bolady. Ol bokspen únemi shuǵyldanady, sport sheberliginen úmitker, sondaı-aq voleıbol, ústel tennısin oınaǵandy jany súıedi.
A.Maǵzumov qyzmet merzimi bitkennen keıin kelisimshartpen qalǵysy keledi. Ol Astanamen bir jylda ómirge kelgenin umytqan emes. Qazaq eliniń maqtanyshyna aınalǵan elordamen ózi de alǵa basatynyna senimi nyq.
«Astananyń qurdasy ekenimdi oılasam, keýdemdi maqtanysh sezimi kerneıdi. Maǵan elordanyń eńseli kelbeti keremet unaıdy. Árıne, júregimniń bir buryshynda Jezqazǵan da turady. Bolashaqta elimizdiń jan-jaqty damyp, gúldene beretinine senimdimin. Ol úshin biz sııaqty jastar qazirgi zamanǵy talaptarǵa saı keletin bilim alyp, ozyq tehnologııalardy meńgerip, ár salada tyńǵylyqty eńbek ete bilýi kerek», - dedi Azamat Maǵzumov.
