Elordada trıatlonnan Azııa chempıonaty ótedi
NUR-SULTAN. QazAqparat - 3-5 qyrkúıekte Orta Azııada alǵash ret astanalyq Trıatlon parkte trıatlonnan Azııa chempıonaty ótedi, dep habarlaıdy QazAqparat Mádenıet jáne sport mınıstrligine silteme jasap.
Qurlyq birinshiligi 2021 jylǵy trıatlon maýsymynyń basty dodasyna aınalady.
Chempıonatta U19 (19 jasqa deıingi), U23 (23 jasqa deıingi) sanatyndaǵy sportshylar jáne Mixed Relay (estafetalyq komandalar) qatysady. On toǵyz jasqa deıingi sportshylar 750 m júzý, 20 km velojarys pen 5 km júgirýden turatyn sprınter qashyqtaǵy Azııa chempıonyn anyqtaıdy. U23 sanatyndaǵy sportshylar odan eki ese uzyn olımpıadalyq qashyqtaǵy qurlyq chempıony ataǵy úshin synǵa túsedi. Quramyna eki ekiden er jáne áıelder kiretin estafetalyq komandalar 250 m júzý, 6,6 km velojarys pen 1,6 km júgirýden quralatyn qashyqty toqtaýsyz baǵyndyrady.
«Astanamyzda qurlyqtyq chempıonatty ótkizý quqyǵyna ıe boldyq. Federatsııa basshysy Aldııar Qaztaevqa kórsetken qoldaýy úshin alǵys aıtamyn. Sportshylarymyz úshin bul úlken múmkindik – olar óz elinde jattyǵyp, dodaǵa túse alady. Eldegi birinshilikte júldeli oryndarǵa ıe bolý úshin qoldan kelgendi jasaýǵa tyrysamyz», - dedi ulttyq quramanyń bas bapkeri Nurjan Úsipbekov.
Chempıonattaǵy jeke esepte Azııa elderinen kelgen 130 sportshy (65 er jáne 65 áıel) qatysady dep kútilýde. Saıyskerler álemdik reıtınginiń upaıy úshin básekelesedi.
