Elordada travmatologııa jáne ortopedııa ortalyǵyna ǵımarat salýǵa jer tabylmaı jatyr

ASTANA. QazAqparat – Elordada akademık N.Bátpenov atyndaǵy Ulttyq travmatologııa jáne ortopedııa ǵylymı ortalyǵyna jańa ǵımarat salý úshin jer telimi tabylmaı jatyr. Bul jaıynda Premer-Mınıstrdiń orynbasary Altaı Kólginovtiń Májilistiń taratylǵan 7-shaqyrylym depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

Onyń atap ótýinshe, qazirgi ýaqytta atalǵan ortalyqtyń bazasynda 385 tósek-orynǵa arnalǵan 14 klınıkalyq bólimshe jumys istep tur.

Sonymen qatar býyndardy endoprotezdeý, artroskopııa jáne sporttyq jaraqattar, omyrtqa patologııasy boıynsha 3 respýblıkalyq ortalyq ashylǵan. 1971 jyly salynǵan ortalyq ǵımaratynyń jalpy aýdany 24 356 sharshy metrdi quraıdy ári tozyǵy jetken.

Qazirgi zamanǵy standarttarǵa da, sanıtarlyq erejeler men normalar talaptaryna da saı kelmeıdi.

«Búginde Densaýlyq saqtaý mınıstri Astana qalasynyń ákimdigimen nysan qurylysyna jer ýchaskesin bólý máselesin pysyqtap jatyr. Ótıkeni, buǵan deıin nysan qurylysyna bólingen jer ýchaskesi elordanyń «jasyl beldeýinde» jatqandyqtan berý múmkin bolmaı otyr. Astana qalasynyń ákimdigi Ulttyq travmatologııa jáne ortopedııa ǵylymı ortalyǵynyń jańa ǵımaratyn salý úshin 5 jer ýchaskesin usyndy. Biraq, usynylǵan jer ýchaskelerinde ınjenerlik kommýnıkatsııa joq, ornalasqan jeri de yńǵaısyz. Aýmaǵy da jetkilikti emes. Bul jaıt aldaǵy ýaqytta jobany júzege asyrýda qıyndyq týdyrady», - dedi Altaı Kólginov jaýabynda.

Vıtse-mınıstrdiń atap ótýinshe, nysan salýǵa arnalǵan jer ýchaskesi anyqtalǵannan keıin zańmen belgilengen tártippen jobalyq-smetalyq qujattama ázirlenedi.

2024-2026 jyldarǵa arnalǵan respýbılkalyq bıýdjetti qalyptastyrý aıasynda atalǵan máseleni odan ary qaraý úshin memlekettik saraptama júrgiziledi.

«Osyǵan oraı Densaýlyq saqtaý mınıstrligine Qarjy, Ulttyq ekonomıka mınıstrlikterimen jáne Astana qalasynyń ákimdigimen birlesip, akademık N.Bátpenov atyndaǵy Ulttyq travmatologııa jáne ortopedııa ǵylymı ortalyǵynyń jańa ǵımaraty qurylysy boıynsha jumysty jedeldetý tapsyryldy», - dedi ol.