Elordada «Toyota Land Cruiser» boıjetkendi qaǵyp, mert qyldy
NUR-SULTAN. QazAqparat - Keshe keshkisin elordada jol talǵamaıtyn kólik boıjetken qyzdy qaǵyp ketti, dep habarlaıdy QazAqparat tilshisi.
«19 jeltoqsanda «Toyota Land Cruiser 200» kóligin tizgindegen 53 jastaǵy júrgizýshi Imanov kóshesi jaqtan Áýezov kóshesine qaraı kele jatyp, burylys kezinde baǵdarshamnyń ruqsat etilgen jasyl túsine ótip bara jatqan jaıaý júrginshini qaǵyp ketti. 19 jastaǵy elorda turǵyny alǵan jaraqatynan oqıǵa ornynda qaza tapty. Kýálandyrý nátıjesinde júrgizýshiniń mas bolmaǵany anyqtalyp, qamaýǵa alyndy», - delingen Nur-Sultan qalalyq Polıtsııa departamenti taratqan aqparatta.
Vedomstvo málimetinshe, atalǵan fakti boıynsha sotqa deıingi tergeý amaldary júrgizilip jatyr.
Osy oraıda Nur-Sultan qalalyq Polıtsııa departamenti kólik quraldary júrgizýshilerin joldardyń kóktaıǵaq bolýyna baılanysty qozǵalys kezinde barynsha saq bolýǵa, jyldamdyq rejımin saqtap, qaýipsiz araqashyqtyqty ustaýǵa jáne jaıaý júrginshiler jolaǵy aldynda barynsha abaı bolýǵa shaqyryp otyr.
