Elordada tótenshe jaǵdaılar azaıǵan
ASTANA. QazAqparat - 2013 jyldyń qorytyndysy boıynsha elordada tótenshe jaǵdaılar sany 35%-ǵa tómendedi. Bul týraly Tótenshe jaǵdaılar departamentine silteme jasap, elorda ákimdiginiń resmı saıty habarlaıdy.
«2013 jyldyń qańtar-jeltoqsan aılarynda Astana qalasynda tótenshe jaǵdaılar sany birshama tómendegen. Mysaly, ótken jyly 237 tótenshe jaǵdaı oryn alǵan, bul 2012 jylmen (370 TJ) salystyrǵanda 35%-ǵa kem», - delingen habarlamada.
Bul týraly Astana qalasynda tótenshe jaǵdaılardyń aldyn alý jáne joıý jónindegi komıssııa otyrysynda málim boldy. Oǵan Astana qalasy ákiminiń orynbasary Vasılıı Krylov, Tótenshe jaǵdaılar jónindegi komıssııa tóraǵasynyń orynbasary - qalalyq TJD bastyǵy, general-maıor Meıram Ysqaqov, TJD bastyǵynyń orynbasary, polkovnık Barat Duzaqbaev jáne komıssııa músheleri men sharýashylyq obektisiniń basshylary qatysty.
Otyrys barysynda komıssııanyń 2013 jyldaǵy jumysy qorytyndylanyp, 2014 jylǵa alǵa qoıǵan mindetteri talqylandy. Tótenshe jaǵdaılardyń aldyn alý maqsatynda komıssııa tótenshe jaǵdaılardyń aldyn alý men olardy joıý júıesin daıyndaý boıynsha josparlar men is-sharalardy júzege asyrý týraly sheshim qabyldady.
Esil aýdanynyń ákimi men kommýnaldyq sharýashylyq basqarmasyna Ilınka kentinde bóget salýdy baqylaýǵa alý tapsyrylyp, atqarylǵan jumystar boıynsha esep berý júkteldi.
