Elordada tótenshe jaǵdaı rejımin buzǵany úshin 22 adam jaýapqa tartylady

NUR-SULTAN. QazAqparat - Búginde elordadaǵy jaǵdaı turaqty jáne tolyq baqylaýda. Bul týraly Nur-Sultan qalasynyń Polıtsııa departamentinen málim etti, dep habarlaıdy elorda ákimdiginiń resmı saıty.

Tótenshe jaǵdaı bastalǵannan beri qalada «102» arnasyna qońyraý shalý sany eki esege artty. Úsh kún ishinde 9076 qońyraý túsken. Elorda turǵyndaryn anyqtamalyq sıpattaǵy máseleler, qalaǵa kirý jáne shyǵý, HQKO-lardyń, bankter men saýda ortalyqtarynyń jumys tártibi qyzyqtyrdy. Polıtsııa qyzmetkerleri qala turǵyndaryna konsýltatıvtik jáne psıhologııalyq kómek kórsetti.

Aıta keteıik, sońǵy úsh táýlikte elordada 45 qylmys tirkelgen. Sondaı-aq, 2 myńnan astam ákimshilik quqyq buzýshylyq anyqtaldy. Kólikti mas kúıinde basqarǵany úshin eki júrgizýshi ustaldy, olar sot sheshimimen Polıtsııa departamentiniń arnaıy qabyldaý ornyna qamaldy. «QR ÁQBK-niń 476-babyna sáıkes tótenshe jaǵdaı jarııalanýyna baılanysty memlekettik organ belgilegen rejımdi buzǵany nemese talaptardy oryndamaǵany úshin 22 adam tartyldy. Kinálilerge qatysty protsessýaldyq sheshimdi sot qabyldaıdy», - delingen vedomstvo habarlamasynda. Sondaı-aq, qalanyń perımetri boıynsha blokposttar ornatyldy, elordaǵa kirý jáne shyǵý shektelgen. Qala turǵyndary blok-beketter arqyly tek kúndizgi ýaqytta ǵana óte alady. Qyzmetkerler azamattardyń qujattaryn, sondaı-aq tyıym salynǵan zattardyń bar-joǵyn tekseredi.

Esterińizge sala keteıik, qalada túngi saǵat 23:00-den tańǵy 7:00-ge deıin «komendanttyq saǵat» engizildi, ıaǵnı jaıaý júrýge jáne kólik quraldaryna tyıym salynǵan. Qozǵalysqa ruqsat tek elordanyń tynys-tirshiligine jumyldyrylǵan azamattarǵa ǵana berildi. Bekitilgen Erejelerge sáıkes, bıznes sýbektilerine saýda nysandary, bazarlar, dúkender, dárihanalar jáne basqa uıymdarǵa saǵat 08:00-den 22:00-ge deıin jumys isteýge ruqsat etiledi, alkogol ónimderin satýǵa tyıym salyndy. «Qoǵamdyq tártip pen azamattardyń tynyshtyǵyn buzbaýdy, sondaı-aq qalada TJ rejımin saqtaý kerektigin eskertemin. Tótenshe jaǵdaı kezinde qylmystyq nemese ákimshilik quqyq buzýshylyqtardy jasaý aýyrlatatyn mán - jaı bolyp tabylady jáne neǵurlym qatań jaýapkershilikke ákep soǵady», - dedi Polıtsııa departamentiniń bastyǵy Erjan Sádenov.