Elordada tótenshe jaǵdaı rejımın buzǵan 35 adam qamaýǵa alyndy
NUR-SULTAN. QazAqparat – Elordada tótenshe jaǵdaı rejımın buzǵan 35 adam qamaýǵa alyndy. Bul týraly Nur-Sultan qalalyq prokýratýrasynan málim etti, dep habarlaıdy QazAqparat tilshisi.
Vedomstvo málimetinshe, elimizde tótenshe jaǵdaı jarııalanǵan sátten bastap elordalyq quqyq qorǵaýshylar 159 adamdy jaýapkershilikke tartqan. Onyń ishinde 39 adam - zańsyz kásipkerlik qyzmetpen aınalysqan, 119-y - tótenshe jaǵdaı rejımin buzǵan jáne 1 adam tótenshe jaǵdaı kezinde quqyqtyq tártipti buzýǵa ıtermeleıtin áreket jasaǵan. Ákimshilik materıaldardy qaraý nátıjesinde 124 adamǵa jalpy somasy 3 883 715 teńgeni quraıtyn ákimshilik aıyppul salynyp, 35 adam qamaýǵa alyndy. Sonymen qatar sot sheshimimen quqyq buzýshylardan 2 24,7 lıtr antıseptık, 17 946 dana medıtsınalyq masqa memleket kirisine tárkilendi.
«Karantın talaptaryn buzý jáne adamdar jınalatyn nysandardyń zańsyz jumys faktileri boıynsha 74 sýbekti, onyń ishinde 13 dámhana, azyq-túlik emes zattar satatyn 14 dúken, 8 ashana, 6 dóner dúńgirshegi, 3 bılıard klýby, 3 tigin salony, 5 kompıýterlik klýb, 5 sulýlyq salony, 5 saýna, 1 SPA jáne 5 tehnıkalyq qyzmet kórsetý stansasy jaýapqa tartyldy. Aıtalyq, 24 naýryz kúni Nur-Sultan qalalyq ákimshilik sotynyń qaýlysymen azamat O.R. 5 táýlikke ákimshilik qamaýǵa alyndy. Ol uıǵarymǵa qaramastan ózine tıesili «Dostar» bılıard klýbynyń jumys isteýine jol bergen», - dep atap ótedi qalalyq prokýratýradan.
