Elordada tótenshe jaǵdaı qyzmetiniń qysqa daıyndyǵy pysyqtalyp jatyr
Tótenshe jaǵdaıǵa daıyndyq sharasyna elordanyń tótenshe jaǵdaı qyzmeti, polıtsııa, azamattyq qorǵanys, jedel járdem, tazalyq jáne taǵy basqa qyzmet mamandary qatysty.
Oqý-jattyǵý qala syrtyndaǵy Saryarqa aýdanynyń qar polıgonynda ótti jáne ol 5 kezeńnen turdy.
Birinshi, qalanyń jedel áreket etý jıyntyq jasaǵynyń sap túzeýi, ekinshi qarly borannan jáne jolda aýdarylǵan avtobýstan adamdardy shyǵaý, zardap shekkenderdi evakýatsııalaý, úshinshi qarly boranda ańshylar men balyqshylardy izdeý, tórtinshiden, jol-kólik apatyna ushyraǵan kólikten adamdardy qutqarý jáne qabyldaý, jylytý beketteriniń daıyndyǵy jáne medıtsınalyq, psıhologııalyq kómek kórsetý.
«Búgin elordanyń azamattyq qorǵanys qyzmetiniń qys mezgiline daıyndyǵy pysyqtalyp jatyr. Azamattyq qorǵanys qyzmeti elordamen qatar onyń irgesinde ornalasqan eldimeken turǵyndaryna da kómek kórsetedi. Aldymyzda qys kele jatyr, osy oraıda qorǵanys qyzmeti tótenshe jaǵdaıǵa saqadaı saı bolýy tıis. Sondyqtan da qys túspeı daıyndyqty taǵy bir pysyqtap jatyrmyz. Bul jerde birneshe sala boıynsha qyzmet túri bar, olardyń tótenshe jaǵdaıda bir kisideı jumylyp jumys isteýi óte mańyzdy. Onyń ústine mamandar tehnıkamen jumys isteıdi, onyń da daıyndyǵy nazarda. Oqý-jattyǵý barysynda qoldan tótenshe jaǵdaı uıymdastyrylady. Sol arqyly mamandar men tehnıkanyń qanshalyqty jyldam ári tıimdi áreket etetinin tekseremiz», - dedi Nur-Sultan qalasy ákiminiń orynbasary Ermek Qızatov shara barysynda.
Onyń aıtýynsha, qorǵanys qyzmetinen bólek, tótenshe jaǵdaı týyndaǵanda Ulttyq ulan men volonterler de jumyldyrylady.
«Qys – 2021» respýblıkalyq komandalyq-shtabtyq oqý-jattyǵýyna elordanyń 32 mekemesi qatysyp otyr. Ár mekemeniń óz mindeti bar. Jáne tótenshe jaǵdaı týyndaǵanda ár mekeme óz jumysyn atqaryp qana qoımaı, basqa qyzmet túrlerimen ózara yqpaldasyp áreket etýi tıis. Osyndaı oqý-jattyǵý jylyna 2 ret ótedi, qysta jáne kóktemde. Búgingi daıyndyq sharasyna azamattyq qorǵanys salasynyń 145 mamany men 37 tehnıka qatysyp otyr», - dedi qalalyq tótenshe jaǵdaılar departamenti tótenshe jaǵdaıdy joıý basqarmasynyń basshysy Eldor Raıymbekov.
Aıta keteıik, elordadaǵy qysqa daıyndyq sharasy eki kúnge jalǵasady.
