Elordada tórt kólik soqtyǵysty
NUR-SULTAN. QazAqparat – Elordada 22 aqpan kúni saǵat 19:22 shamasynda «Hyundai» markaly kóliktiń 31 jastaǵy júrgizýshisi Túrkistan kóshesimen Orynbor kóshesine qaraı ketip bara jatyp baǵdarshamnyń tyıym salǵan túsine ótip ketken.
Nátıjesinde ol «Subaru XV» kóligimen soqtyǵysty. Al «Subaru XV» ınertsııamen «Subaru Legacy» jáne «Chevrolet Malibu» kólikterin soqty, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.
Jol-kólik oqıǵasy saldarynan tórt azamat zardap shekti. Olardyń bárine medıtsınalyq kómek kórsetildi. Eki adam aýrýhanaǵa jetkizildi. Atalǵan fakti boıynsha tergeý jumystary júrgizilýde.
Elorda aýmaǵynda bir táýlikte 115 jol-kólik oqıǵasy tirkeldi.
Polıtsııa departamenti júrgizýshiler men jaıaý júrginshilerdi jolda asa qyraǵy bolyp, jol qozǵalysy erejelerin saqtaýyn suraıdy.
