Elordada tóbeles kezinde eki er adam mert boldy
NUR-SULTAN. QazAqparat – Elordada Beton zaýytynyń aýmaǵynda tóbeles bolyp, eki adam ajal qushty, dep habarlaıdy QazAqparat.
Polıtsııa departamentiniń habarlaýynsha, 22 jeltoqsanda saǵat 23.30-da «102» arnasyna Beton zaýytynyń aýmaǵynda tóbeles bolyp jatqany týraly habarlama kelip tústi. Dereý oqıǵa ornyna polıtsııa qyzmetkerleri bardy.
«Tóbeles saldarynan aýrýhanaǵa eki er adam jetkizildi. Bireýine keýde tusynan oq tıgen, ekinshi adam qaryn tusynan pyshaq salynǵan. Ekeýi de qaıtys boldy. Polıtsııa qyzmetkerleri qaza tapqandardyń jeke basyn anyqtady. Olar Qyzylorda oblysynda týyp-ósken 39 jáne 44 jastaǵy er adamdar bolyp shyqty» delingen habarlamada.
Sonymen qatar, aýrýhanaǵa 24 jastaǵy jigit atys jaraqatymen jetkizilgen.
Janjal arazdasýshylardyń biri qaryzyn qaıtarmaýy saldarynan týyndaǵan. Sońy tóbeleske ulasyp, pyshaq jáne atys qarýlary qoldanylǵan.
Oqıǵaǵa qatysqan 11 adam anyqtalyp, ustaldy. Zattaı dáleldemeler tárkilendi. Atalǵan fakti boıynsha QR QK 99-baby 2-bóligi boıynsha qylmystyq is qozǵaldy. Tergeý amaldary júrgizilýde.
