Elordada TMD-daǵy alǵashqy Innovatsııalyq-tehnologııalyq hab keńsesi ashyldy

«Seedspace Nur-Sultan» ortalyǵy kásipkerler, startapshylar men frılanserler ózara tájirıbe almasyp, jobalardy talqylaıtyn keńistik qurý maqsatynda ashylyp otyr.

Uıymdastyrýshylardyń aıtýynsha, jańa alań jańa ınnovatsııalyq ıdeıalar men sheshimderdiń qaınaǵan ortalyǵyna aınalmaq. Budan bólek, onda mentorlardyń, keńesshiler men tehnıkalyq mamandardyń aýqymdy jelisi jumys jasaıdy.

«TMD aýmaǵynda alǵash «Seedspace Nur-Sultan» atty halyqaralyq ınnovatsııalyq alań ashylyp otyr. Búginde elorda elimizdiń eń jas ári megopolıs qalasy bolyp tabylady. Sonymen qatar, astanamyz halyqaralyq mańyzdy oqıǵalar ótetin hab alańyna aınalyp otyr. 20 jyldyń ishinde elorda barlyq baǵytta joǵary jyldamdyqpen damý ústinde. Ásirese, astanalyqtardyń ál-aýqatyn jaqsartýǵa baǵyttalǵan sharalar kóptep júzege asyrylýda. Jol kartasy baǵdarlamasy boıynsha 183 mlrd teńgeniń 1142 kásipkerlik nysany paıdalanýǵa berildi. Sondaı-aq, shaǵyn jáne orta kásip sýbektilerine 1 mlrd teńge kóleminde mıkrokredıt bólindi. Sonyń nátıjesinde 9 myńnan adam jumys ornyn saqtap qaldy jáne 5600 jańa jumys orny ashyldy. Qalanyń ekonomıkasy tek kórsetkishtermen ǵana emes, jyl sanap turaqty jáne ınnovatsııalyq turǵydan da damyp keledi», - dedi qala ákimi Baqyt Sultanov.

Sonymen qatar, shahar basshysy elordada «Aqyldy qala», «Big Data», «Sergek», Smart Astana, «Ikomek», elektrondy PIK jobalarynyń sátti iske asyrylyp otyrǵanyn aıtyp ótti.

100-ge jýyq adamǵa arnalǵan «Seedspace Nur-Sultan» 7 kabınetten turady. Onyń ishinde kovorkıng keńseleri, konferentsııa zaly jáne demalys bólmesi bar.

Bas qaladaǵy «Hilton» qonaq úıiniń janynan ashylǵan ortalyq jyl boıy jáne 24 saǵat boıy jumys isteıdi.

Aıta keteıik, atalǵan joba qala ákimdigi, «Astana Innovations», «Seedstars» jáne «BI Group» kompanııasynyń birlesýimen júzege asyryldy.