Elordada TMD-da balamasy joq áskerı qalashyq salyndy - N.Nazarbaev
ASTANA. QazAqparat - Elbasy Qazaqstan Respýblıkasy Ulttyq ulanynyń jańa úlgidegi áskerı qalashyǵynyń ashylýyna qatysty, dep habarlady Aqordanyń baspasóz qyzmeti.
Qalashyqty ashý barysynda Memleket basshysy Ulttyq ulannyń jedel brıgadasynyń jeke quramyna aıbyn men dańqtyń sımvoly - Áskerı týdy tapsyrdy.
Elbasy ofıtserler men áskerı qyzmetshiler úshin búgin erekshe kún ekenin, óıtkeni elordada TMD-da balamasy joq áskerı qalashyq salynǵanyn aıtty.
- Munda áskerı qyzmetshilerdiń otbasymen turýyna, qyzmet atqarýyna, áskerı daıyndyǵyn shyńdaýǵa barlyq jaǵdaı jasalǵan. Osynyń bári memlekettiń qamqorlyǵyn kórsetedi. Sizderdiń mindetterińiz - eldegi tatýlyq pen tynyshtyqty saqtaý, Qazaqstan azamattary quqyqtarynyń qorǵalýyn qamtamasyz etý, qylmyspen kúres júrgizý. Respýblıkanyń Qarýly Kúshteriniń bir bóligi bolǵandyqtan, sizder sondaı-aq táýelsiz eldi qorǵaýǵa, shekarasynyń bútindigin qamtamasyz etýge daıyn bolýǵa tıissizder. Memlekettiń qamqorlyǵyna sizder laıyqty eren eńbekpen jáne joǵary mashyqpen jaýap beretinderińizge senimdimin, - dedi Nursultan Nazarbaev.
Qazaqstan Prezıdenti áskerı qyzmetshiler men ofıtserlerdi áskerı qalashyqtyń ashylýymen taǵy da quttyqtap, olarǵa tabys pen myqty densaýlyq tiledi.
Sonymen qatar, áskerı qalashyqty aralap kórý barysynda Memleket basshysyna aıryqsha aıyrym belgisi - «bederli beret» jáne «Búrkit» arnaıy maqsattaǵy jasaǵynyń tósbelgisi tapsyryldy.
***
Jańa áskerı qalashyqta jalpy alańy 64 myń sharshy metr bolatyn 53 ǵımarat pen qurylys bir mezgilde paıdalanýǵa berildi.
Áskerı qalashyqtyń ınfraqurylymy jeke quramnyń jaýyngerlik sheberligin jetildirýge, jedel brıgadanyń jaýyngerlik daıyndyǵyn shyńdaýǵa, Astana qalasyndaǵy qoǵamdyq qaýipsizdik pen quqyq tártibin saqtaý jónindegi kúndelikti tapsyrmany sapaly oryndaýǵa múmkindik beredi.
Qalashyqtyń aýmaǵynda shtab pen úsh kazarma ǵımaratynan bólek, avtokólik parki, túrli zaldary men mýltımedııalyq atys tıri bar sport kesheni, stadıon, sport jáne oqý qalashyqtary, mádenı-saýyq ortalyǵy, zamanaýı medıtsınalyq jabdyqtarmen jabdyqtalǵan lazaret bar.
Ofıtserler men kelisimshart boıynsha jumys isteıtin otbasyly áskerı qyzmetshiler úshin 104 páterli turǵyn úı salynǵan.
