Elordada tirkelgen qylmystardyń sany 30 paıyzǵa qysqardy

NUR-SULTAN. QazAqparat – Elordanyń Polıtsııa departamentinde ótken jyldyń qorytyndysy jarııalandy. Jalpy, 2020 jyly qabyldanǵan sharalardyń arqasynda qylmystar 30 paıyzǵa tómendegen. Urlyq 54 paıyzǵa, al tonaý faktileri 56 paıyzǵa kemidi, dep habarlaıdy QazAqparat.

«Qoǵamdyq oryndarda, kóshelerde, alkogoldik ishimdikke masaıǵan kúıde, sondaı-aq kámeletke tolmaǵandar tarapynan qylmystar az jasalǵan. Barlyq baǵyttar boıynsha qylmystyń betin ashý jaqsarǵan», - delingen baspasóz qyzmetiniń málimetinde.

Jol-kólik oqıǵalary 17,2 paıyzǵa, onyń saldarynan zardap shekkender 24,9 paıyzǵa, qaza bolǵandar 13,9 paıyzǵa kemidi. Kólikti mas kúıinde basqarǵany úshin 988 júrgizýshi ákimshilik qamaýǵa alyndy.

«Qoǵamǵa tóndiretin qaýpin eskere otyryp, esirtki taratý arnalary men sıntetıkalyq esirtkini daıyndaıtyn jasyryn oryndardy anyqtaýǵa erekshe ekpin qoıylyp otyr. Bul baǵyttaǵy jumystarǵa qala turǵyndary kómekterin kórsetip keledi. Olardyń aqparaty boıynsha 109 jarnama saıty buǵattaldy», - dep atalyp ótti departament habarlamasynda.

Sonymen qatar polıtsııa karantındik talaptardyń oryndalýyna qatysty tıisti jumystardy atqardy. 2020 jyly monıtorıngtik mobıldik toptar sanıtarlyq normalardy buzýdyń 2,5 myńnan astam faktisin anyqtady.