Elordada «Til - halyq jandúnıesin taný kilti» atty respýblıkalyq konkýrs bastaldy
ASTANA. Jeltoqsannyń 12-si. QazAqparat /Marlan Jıembaı/ - Búgin elordadaǵy Reseı ǵylym jáne mádenıet ortalyǵynda «Til - halyq jandúnıesin taný kilti» atty orys jastarynyń arasyndaǵy qazaq tili bilgirleriniń respýblıkalyq konkýrsy bastaldy,
dep habarlaıdy QazAqparat.
Baıqaýdyń ashylý rásimine qatysqan QR Mádenıet jáne aqparat mınıstrligi Til komıtetiniń tóraǵasy Erbol Shaımerdenniń aıtýynsha, qazaq tilin úırenýge degen ynta tek qana elimizde emes, sonymen birge basqa memleketterde de anyq baıqalady. Oǵan elimizdegi orys jastarymen qatar Máskeý memlekettik lıngvıstıkalyq ýnıversıteti halyqaralyq qatynastar jáne áleýmettik-saıası ǵylymdar fakýltetiniń qazaq tilin oqyp júrgen stýdentteriniń baıqaýǵa qatysýy dálel bola alady.
Aıta keteıik, birneshe jyldan beri atalǵan ýnıversıtettiń janynan qazaq tili men mádenıeti ortalyǵy jumys isteıdi. Onyń ashylýyna Memleket basshysy Nursultan Nazarbaev jan-jaqty qoldaý kórsetken bolatyn.
Sonymen baıqaýǵa oblystyq jáne qalalyq irikteý kezeńderinde jeńiske jetken 14 pen 22 jas aralyǵyndaǵy JOO stýdentteri men mektep, kolledj oqýshylary qatysýda. Konkýrstyń tórt kezeńnen turatyn sharty boıynsha árbir qatysýshy týǵan ólkesin tanystyrady, Qazaqstannyń tarıhy men qazirgi kezeńi týraly áńgimeleıdi jáne shyǵarma jazady. Al sońǵy kezeńde án aıtý, bı bıleý nemese ulttyq aspapta oınaý arqyly qazaq halqynyń ulttyq mádenıetin kórsetedi.
Jeńimpazdar aqshalaı jáne arnaıy dıplomdarmen marapattalady.
