Elordada tergeýshige para bergen áıel 15 jylǵa sottalýy múmkin
«Nur-Sultan qalalyq polıtsııa departamentiniń Ózindik qaýipsizdik basqarmasyna Esil aýdandyq polıtsııa basqarmasynyń tergeýshisi júginip, qylmystyq is boıynsha ótip jatqan fıgýranttardyń birinen 100 myń teńge kóleminde aqsha aýdarylǵanyn málim etti. Jedel-tergeý amaldaryn júrgizý nátıjesinde, sondaı-aq jemqorlyq qylmysy týraly der kezinde eskertken tergeýshiniń adaldyǵynyń arqasynda, aýdarylǵan aqsha qaıtarylǵannan keıin Polıtsııa basqarmasynyń ǵımaratynda Nur-Sultan qalasynyń 56 jastaǵy áıel turǵyny ustaldy. Ol qylmystyq istiń ońdy sheshilýi úshin atalmysh somany para retinde aýdarǵan», - dep habarlaıdy qalalyq Polıtsııa departamentinen.
Qazir osy oqıǵa boıynsha QR Qylmystyq kodeksiniń 367-baby 1-bóligi boıynsha sotqa deıingi tergeý amaldary júrgizilip jatyr.
Qalalyq polıtsııa departamenti para berý 3 jyldan 15 jylǵa deıin bas bostandyǵynan aıyrýǵa ákep soqtyrýy múmkindigin eskertedi.
«Osyǵan baılanysty azamattardy ishki ister organdarymen qatysy bar jumysta quqyqqa qaıshy áreketterge barmaýǵa shaqyramyz. Al laýazymdy tulǵa tarapynan para bopsalaý faktileri bolǵan jaǵdaıda Beıbitshilik, 19 mekenjaıynda ornalasqan Nur-Sultan qalalyq Polıtsııa departamentiniń Ózindik qaýipsizdik basqarmasyna nemese 8 702 127 98 18 telefon nómirine (aqparattyń qupııalylyǵyna kepildik beriledi) habarlasý qajet», - delingen habarlamada.