Elordada tergeý ızolıatoryna alkogol toltyrylǵan jemis kirgizbek bolǵan
NUR-SULTAN. QazAqparat – Elordalyq tergeý ızolıatorynda jedel aqparatty tekserý aıasynda ETs-166/1 mekemesindegi kúdiktige medıtsınalyq spırt toltyrylǵan jemister men kókónisterdi jiberý áreketiniń jolyn kesti, dep habarlaıdy QazAqparat Nur-Sultan qalalyq QAJ departamentiniń baspasóz qyzmetine silteme jasap.
Sálemdemeni jetkizýshi – Pavlodar oblysynyń 1994 jyly týǵan turǵynynyń aıtýynsha, qyzanaq, apelsın jáne mandarınge 400 gramm medıtsınalyq spırt quıylǵan. Azamat T.-ǵa qatysty ákimshilik is qozǵaldy, bul áreketi úshin eskertý nemese 10 AEK mólsherinde aıyppul salynady.
QAJ mekemelerinde ustalatyn adamdarǵa tyıym salynǵan zattardy jiberý áreketi bólimshelerde belgilengen quqyqtyq tártipte, QR ákimshilik quqyqbuzýshylyq kodeksinde jaýapkershilik belgilegen quqyqbuzýshylyqqa jatady.
«Alaıda, sottalǵandar paıdalanýǵa tyıym salynǵan zattardy alyp kirýdiń aldyn alý úshin sálemdeme ákelgendermen túsindirý jumystary júrgizilgenine qaramastan, tyıym salynǵan zattardy berýge tyrysqan, olarǵa qatysty QR ÁQBK sheńberinde shara qoldanylǵandar týraly aqparat jetkiziledi, tyıym salynǵan zattardy kirgizý tásilderi de jetilip keledi. Mekeme aýmaǵyna spırttik ishimdikter, esirtki zattary syndy tyıym salynǵan zattardyń enýi sottalǵandardyń jańa qylmys jasaýyna jáne olardyń jazany óteýdiń belgilengen tártibin buzýyna ákep soǵýy múmkin, bul sottalǵannyń jaǵdaıyn aýyrlata túsedi», -dep túsindirdi Nur-Sultan qalasy QAJ departamentiniń bastyǵy Dáýlet Rahymbekov.
