Elordada terezeden qulap ketken eki balanyń bireýi kóz jumdy
NUR-SULTAN. QazAqparat – Elordalyq polıtseıler karantın rejıminde kámelet jasyna tolmaǵan balalardyń qaýipsizdigine basa nazar aýdarý kerektigin aıtýda, dep habarlaıdy QazAqparat qalalyq polıtsııa departamentine silteme jasap.
Elordada tótenshe jaǵdaı engizilgennen bastap balalardyń terezeden qulaý faktisi eki ret tirkelgen. Bir bala qaza tapty.
«19 naýryz saǵat 13.30-da eki jasar bala úıdegi as bólmede júrip, terezeniń janyna oryndyq qoıǵan. Keıin aýa jeldetý úshin ashyp qoıǵan terezeniń aldyna shyqqan. Saldarynan qaraýsyz qalǵan bala 4-shi qabattyń terezesinen qulap ketti. Balany qarap júrgen ájesi sol sátte as bólmede úı sharýasymen aınalysyp júrgen. Búldirshin alǵan jaraqatynan aýrýhanada kóz jumdy», - dedi elordalyq polıtsııa departamentinen.
Osyndaı oqıǵa 2 sáýir kúni de bolǵan.
«4 jasar bala páterde anasymen birge júrip, ýaqytsha qaraýsyz qalǵan. Sol sátte terezeniń aldyna shyǵyp, 4-shi qabattyń terezesinen qulap ketken. Bala aýyr jaraqat alyp, aýrýhanaǵa jatqyzyldy. Páterde onyń qasynda anasy bolǵan», - dep habarlady elordalyq polıtseıler.
