Elordada terektiń mamyǵy jınalyp qalǵan jerlerde bir kúnde úsh ret órt shyqqan
NUR-SULTAN. QazAqparat – Elorda kóshelerinde aq qar sekildi terektiń úrpegine tolǵan. Jazda órttiń jıileýine osy mamyq sebep bolady, dep habarlaıdy QazAqparat.
Nur-Sultan qalasynyń Tótenshe jaǵdaılar departamenti qala turǵyndaryna osyǵan baılanysty eskertý jasady. 16 mamyrda bir kún ishinde elordalyq órt sóndirýshiler órtengen terek mamyǵyn sóndirýge úsh ret barǵan. Aıta keterligi, qaıǵyly oqıǵa bolmaǵan jáne jaqyn nysandar men qurylys oryndaryna órt shalmaǵan.
Terek mamyǵy órt kózine aınalmaýy úshin, Nur-sultan qalasynyń Tótenshe jaǵdaılar departamenti qarapaıym erejelerdi saqtaýǵa shaqyrady.
Kez kelgen ashyq otty paıdalanǵanda saq bolý kerek. Balalar terek mamyǵyn órtep jiberýge áýes keledi. Ottyń «aq kilem» ústimen tez taralýyna qyzyǵady. Alaıda mundaı ermek úlken órtke, tipti adam ólimine ákelip soǵýy yqtımal. Terek mamyǵy órtiniń aldyn alý úshin kommýnaldyq qyzmetter men PIK aýlalardy, trotýarlardy, sondaı-aq basqa da terek kóp ósetin jerlerdi ýaqtyly tazalaýǵa, jınaýǵa jáne qaldyqtardy tógýge nazar aýdarýy kerek.
