Elordada Temirbek Júrgenovtiń bilim men mádenıetti damytýdaǵy róli týraly konferentsııa ótti

Konferentsııa jumysyna Qazaqstan Respýblıkasy Úkimeti músheleri, Parlament depýtattary, memlekettik organdarynyń ókilderi, sheteldik jáne otandyq ǵalymdar, joǵary oqý oryndarynyń ustazdary, jas izdenýshileri qatysty. Konferentsııanyń plenarlyq májilisine QR Premer-mınıstriniń orynbasary Gúlshara Ábdihalyqova, Bilim jáne ǵylym mınıstri Aslan Sárinjipov, Mádenıet jáne sport mınıstri Arystanbek Muhamedıuly, Qazaqstannyń Eńbek Eri, halyq jazýshysy Ábish Kekilbaev qatysyp, sóz sóıledi. Sondaı-aq Reseı ǵylym akademııasy Reseı tarıhy ınstıtýtynyń bas ǵylymı qyzmetkeri, tarıh ǵylymdarynyń doktory, professor Tamara Krasovıtskaıa, Tájikstan Respýblıkasy Ǵylym akademııasynyń A.Donısh atyndaǵy Tarıh, arheologııa jáne etnografııa ınstıtýtynyń ǵylymı qyzmetkeri, tarıh ǵylymdarynyń kandıdaty Abdýllo Gafýrov baıandamalar jasady.

Konferentsııanyń sektsııalyq otyrystarynda 90-nan astam baıandama tyńdaldy. Ǵalymdar belgili memleket jáne qoǵam qaıratkerleri, tanymal qazaqstandyq jáne sheteldik ǵalymdar qaıratkerdiń ómiri men qyzmetine baılanysty baıandamalar jasap, sol zamannyń tarıhı oqıǵalary boıynsha óz zertteýleriniń nátıjelerimen kópshilik qaýymdy tanystyrdy. Sonymen qatar T.Júrgenovtiń Qazaqstan jáne Orta Azııa tarıhyndaǵy erekshe rólin, onyń shyǵys halqyn rýhanı azat etý, keńes zamanynda qazaq mádenıetin nyǵaıtý men qazaq halqyn biriktirý jolynda jasaǵan eren eńbegin basa kórsetti.

Aıta keteıik, konferentsııa qarsańynda Qyzylorda oblysy ákimdiginiń qoldaýymen ǵylymı eńbekter jınaǵy jáne Qorqyt Ata atyndaǵy Qyzylorda memlekettik ýnıversıteti ǵalymdarynyń qurastyrýymen "Temirbek Júrgenov - muraǵat qujattarynda" atty qujattar jınaǵy jaryq kórdi. Jıyn barysynda memleket jáne qoǵam qaıratkeri Temirbek Júrgenov týraly derekti fılm kórsetildi. Onyń sońynda qatysýshylar T.Júrgenovtiń tulǵasyna jáne onyń tarıhı mańyzdy qyzmetine qatysty máselelerdi talqylaý negizinde konferentsııa qararyn qabyldady.