Elordada «telefonym urlandy» dep jalǵan aryz bergen boıjetken jaýapqa tartylýda
NUR-SULTAN. QazAqparat – Elorda turǵyny uıaly telefonynyń joǵalyp ketkenin aıtyp, polıtsııaǵa negizsiz aryz jazǵan, dep habarlaıdy QazAqparat tilshisi qalalyq Polıtsııa departamentiniń baspasóz qyzmetine silteme jasap.
«Nur-Sultan qalasynyń «Saryarqa» aýdandyq poltsıııa basqarmasyna 24 jastaǵy boıjetken shaǵymdanyp, qalaishilik avtobýstyń ishinde 89 myń teńgelik «Huawei P Smart» uıaly telefonyn qaltasynan bireýdiń jymqyryp ketkenin aıtqan. Іstiń mán-jaıyn anyqtaý kezinde polıtseıler boıjetkenniń sózinde shıkilik baryn sezdi. Kúdiktini anyqtaý úshin polıtsııa qyzmetkerleri beınebaqylaý kamerasy arqyly jábirlenýshiniń ózi aıtqan avtobýsqa otyrmaǵanyn bildi», - dep habarlaıdy qalalyq Polıtsııa departamentinen.
Aqyry boıjetken polıtsııaǵa jalǵan aryz bergenin moıyndaǵan. Anyǵynda ol dostarymen qydyryp júrip, uıaly telefonyn joǵaltyp alǵan kórinedi. «Aryz jazsań tezirek taýyp beredi» degen dostarynyń aqylyn tyńdap, boıjetken ótirik aryz jazýdy jón dep sheshken eken.
Endi aryz jazýǵa kelgen boıjetkenniń ózi QR Qylmystyq kodeksiniń 419-baby (kórineý jalǵan sóz jetkizý) boıynsha qylmystyq jaýapqa tartylýda.
