Elordada tegin balabaqsha týraly aqparatty qaıdan alýǵa bolady

NUR-SULTAN. QazAqparat - Kópbalaly jáne az qamtylǵan otbasydan shyqqan 2 myńnan asa astanalyq búldirshin balabaqshaǵa tegin barady. Bul týraly Nur-Sultan qalasy Bilim basqarmasynyń basshysy Ánýar Janǵozın qalalyq máslıhattyń otyrysynda aıtty, dep habarlaıdy QazAqparat tilshisi.

«Balabaqshaǵa qatysty barlyq suraqtar boıynsha bizdiń basqarmaǵa habarlasyp nemese jaqyn jerdegi balabaqshadan bilýge bolady. ıAǵnı, memlekettik balabaqshalarda konsýltatsııalyq kómek qarastyrylǵan. Odan bólek, bizde elektrondy baza bar, sol boıynsha balabaqshaǵa qatysty aqparatty alýǵa jáne tirkelýge de bolady. Sondaı-aq, men óz uıaly telefon nomerimdi de ashyq jarııaladym, maǵan tikeleı habarlasyp bilýge bolady», - dedi Ánýar Janǵozın.

Aıta ketsek, osydan burynyraq qalalyq ákimdik barlyq quzyrly basshylardyń, ıaǵnı ákim orynbasarlary, aýdan ákimderi men basqarma basshylarynyń telefon nomerleri men áleýmettik jeli paraqshalaryn jarııalaǵan bolatyn. Sonyń ishinde qalalyq bilim basqarmasynyń basshysy Ánýar Janǵozın da bar. Onyń Feısbýk paraqshasy www.facebook.com/azhangozin jáne telefon nomeri [phone].

Odan bólek, basqarma basshysy elordalyq az qamtylǵan jáne kóp balaly otbasydan shyqqan balalardy mektepke deıingi bilim berýmen qamtý jumystarynyń belsendi túrde júrip jatqanyn aıtyp ótti.

«Búgingi kúnge deıin bizge atalǵan áleýmettik statýsqa ıe azamattardan 1 myńnan astam ótinish kelip tústi. Sonyń 700-den astamy balabaqshamen qamtý kómegin surady jáne ol 700 ótinishtiń barlyǵynyń máselesi sheshildi. Onyń ishinde negizgi bóligin balabaqshamen qamtysaq, qalǵanyn shaǵyn ortalyqtardyń qyzmetin usyný arqyly sheshtik. Osy turǵyda jeke kásipkerlerdiń de úlesi zor ekenin aıtyp ótken jón. Jáne bul jumys ári qaraı jalǵasatyn bolady», - dedi ol.

Sonymen qatar, Á.Janǵozın qala ákiminiń az qamtylǵan jáne kóp balaly otbasydan shyqqan balalardy mektepke deıingi bilim berýmen tolyq túrde qamtamasyz etýdi tapsyrǵanyn da tilge tıek etti.

«Qala ákiminiń tapsyrmasyn oryndaý maqsatynda qazir balabaqshalarda ótinish qabyldaıtyn jáne solardy qarap, saralaıtyn arnaıy jumys tobyn qurýdy oılastyrýdamyz. Árıne másele aınalyp kelip qarjyǵa tireledi, sondyqtan aldymen bıýdjet jaǵyn sheship alý kerek. Negizi josparymyz boıynsha qyrkúıek aıynan bastap 2 myńnan astam kóp balaly jáne az qamtylǵan otbasynyń balalaryn balabaqshamen tegin qamtýdy kózdep otyrmyz», - deıdi basqarma basshysy.