Elordada «TEATR ALL» IV Halyqaralyq teatr festıvali bastaldy
ASTANA. KAZINFORM — Óner baıqaýy Qazaqstannyń halyq ártisi, «Parasat», «Qurmet» ordenderiniń ıegeri, qazaqtyń Qyz Jibegi Merýert Ótekeshovanyń 75 jas mereıtoıyna oraı uıymdastyrylyp otyr.
Festıvalge elimizdiń jáne Ázerbaıjan, Ózbekstan, Qyrǵyzstan tárizdi kórshiles memleketterdiń teatr ujymdary qatysyp, baq synaıdy.
Baıqaý aıasynda teatr óneriniń zamanaýı baǵyttary men tyń izdenisteri kórermen nazaryna usynylyp, teatr maıtalmandary arasynda kásibı pikir almasý alańy qalyptasady.
7 qazanǵa deıin jalǵasatyn teatr toıy barysynda elordada jalpy 16 qoıylym qoıylady.
— Bul halyqaralyq festıval meniń atyma arnalǵan. Biraq meniń qýanatynym — bul festıvalge ónerin kórsetý úshin Qazaqstannyń túkpir-túkpirinen qansha teatr ujymy keldi. Ózbekstan, Qyrǵyzstan, Ázerbaıjannan da ónerpazdar kelip, qoıylymdaryn qoıady. Demek, bul baıqaý meniń atymda uıymdastyrylǵanymen, negizinde meniń ustazdaryma arnalǵan. Ásirese, ózim ónerdegi jolymdy bastaǵan «Qyz Jibek» fılminiń rejısseri Sultanahmet Qojyqovty, ýnıversıtet qabyrǵasynda júrgenimdegi ustazym KSRO halyq ártisi Hadısha Bókeevany, myqty rejısser Ázirbaıjan Mámbetovty erekshe ataǵym keledi. Taǵy bir dúnıeni aıtsam deımin. Qazir teatrda kóp oınamaımyn. Sebebi, meniń sahnadaǵy seriktesterim qazir joq. Súıikti jarym Quman aǵalaryń joq. Byltyr Asanáli aǵamyz da ketip qaldy. Biraq olar meniń júregimde. Bul festıval solarǵa arnalǵan. Mereıtoıym aıasynda kıeli sahnada elimizdiń jáne kórshiles memleketterdiń ónerpazdary jınalatynyna óte qýanyshtymyn, — dep aǵynan jaryldy festıvaldiń ashylý saltanatyna qatysqan Merýert Ótekeshova.
Aıta keteıik, buǵan deıin Abaı teatrynda jańartylǵan ınteraktıvti mýzeı ashylǵanyn jazǵanbyz.
