Elordada tájik-aýǵan shekarasynda erlikpen qaza tapqan jaýyngerlerdi eske alý sharasy ótti
ASTANA. 7 sáýir. QazAqparat - Búgin elordadaǵy «Otan ana» monýmenti janynda tájik-aýǵan shekarasynda oryn alǵan urysta erlikpen qaza tapqan 17 jaýyngerdi eske alý sharasy ótip, erlik alleıasyna gúl shoqtary qoıyldy.
Jınalǵan jaýyngerlerdiń, áskerı qyzmetshilerdiń aldynda sóz sóılegen QR ІІM Іshki áskerleri qolbasshysynyń orynbasary, general-maıor Albert Mátkárimov olardyń erligi máńgi este qalatyndyǵyn basa aıta kele: «Búgin Іshki áskerlerdiń barlyq bólimderinde tájik-aýǵan shekarasynda óz ómirlerin qıǵan jigitterdiń erligin este saqtaýǵa arnalǵan sharalar ótýde. Tájikstandaǵy syrtqy shekarany qorǵaýǵa qatysqan olardyń jáne Іshki áskerdiń 2 myńnan astam jaýyngeriniń erligi arqasynda biz memleketimizdiń táýelsizdigin qamtamasyz etip, esirtki men qarý-jaraq dálizine senimdi tosqaýyl qoıdyq», - dedi.
Aıta keteıik, ótken ǵasyrdyń 90-shy jyldary Tájikstan shekarasyn qarý-jaraq pen esirtki dálizine aınaldyrmaq bolǵan qarýly toptarǵa batyl tosqaýyl qoıǵan qazaqstandyq batalon jaýyngerleriniń erligi barshaǵa belgili. 1995 jyldyń 7 sáýiri Іshki áskerler tarıhynda jaýyngerlik iz qaldyrǵan erliktiń kúni bolyp sanalady. Óıtkeni dál osy kúni tutqıyldan tap bergen qarýly topqa Іshki áskerdiń jeke rotasynyń jaýyngerleri qarsy turdy. Tórt jarym saǵatqa sozylǵan shaıqas barysynda Іshki áskerdiń 17 jaýyngeri erlikpen qaza tapty.
