Elordada tazalyq pen ekologııalyq jaýapkershilikti dáriptegen aktsııa uıymdastyryldy
ASTANA. KAZINFORM — Astana kúnine oraı jáne respýblıkalyq «Taza Qazaqstan» ekologııalyq aktsııasy aıasynda elordada «Taza sana — taza qala» atty ekologııalyq vıktorına uıymdastyryldy.
Ekologııalyq aktsııa merekelik kúnniń mańyzdy is-sharalarynyń birine aınalyp, ekologııalyq mádenıetti qalyptastyrýdyń, sondaı-aq kommýnaldyq qyzmet mamandarynyń eńbegine qurmetpen qaraýdyń mańyzyn keńinen nasıhattady. Elordanyń ortalyq alańdarynyń birinde arnaıy ınteraktıvti aımaq uıymdastyrylyp, qala turǵyndary men qonaqtary Astananyń tarıhy, ekologııa, abattandyrý jáne tazalyq qaǵıdalary, sondaı-aq kommýnaldyq qyzmetterdiń jumysy týraly bilimderin synady. Durys jaýap bergen qatysýshylarǵa ekologııalyq taqyryptaǵy estelik syılyqtar tabystaldy.
Aktsııaǵa jalpy 1000-nan astam adam qatysty. Іs-shara barysynda 600-den astam ekologııalyq syılyq, onyń ishinde «Taza sana — taza qala» urany beınelengen brendtik fýtbolkalar, kepkalar men shopperler úlestirildi.
Uıymdastyrýshylar oqý mádenıetin damytýǵa da erekshe nazar aýdardy. Qazaqstan Respýblıkasy Prezıdenti Qasym-Jomart Toqaevtyń oqý mádenıetin damytý jáne oqıtyn ult qalyptastyrý jónindegi bastamasyn qoldaý maqsatynda qatysýshylarǵa 100-den astam kitap syıǵa tartyldy. Olardyń qatarynda qazaq ádebıetiniń kórnekti klassıkteri — Abaı Qunanbaıuly, Muhtar Áýezov, Berdibek Soqpaqbaev, Dýlat Isabekov jáne ózge de qalamgerlerdiń shyǵarmalary boldy.
— Mundaıis-sharalardyń mańyzy óte zor dep oılaımyn. Biz kúnsaıyn taza kóshelermen júremiz, biraq onyń artynda qanshama adamnyń eńbegi turǵanyn kóp jaǵdaıda oılaı bermeımiz. Búgin balammen birge vıktorınaǵa qatysa otyryp, kommýnaldyq qyzmetkerlerdiń eńbegine múlde basqa qyrynan qaradym. Osyndaı bastamalar balalarǵa ózgeniń eńbegin qurmetteýdi jáne qorshaǵan ortaǵa jaýapkershilikpenqaraýdy úıretedi, — dedi aktsııa qatysýshysy Jazıra Bolatova.
Uıymdastyrýshylardyń aıtýynsha, sharanyń negizgi maqsaty — kún saıyn qala tazalyǵyn qamtamasyz etip júrgen mamandardyń eńbeginiń qundylyǵyn turǵyndarǵa jetkizý jáne ınteraktıvti format arqyly ekologııalyq mádenıetti qalyptastyrý.
— Bizdiń maqsatymyz — tek kóńil kóteretin is-shara uıymdastyrý emes. Biz ınteraktıvti format arqyly tazalyq ár adamnyń jeke jaýapkershiliginen bastalatynyn eske salǵymyz keledi. Kommýnaldyq qyzmetkerlerdiń eńbegin qurmetteý, qorshaǵan ortaǵa janashyrlyqpen qaraý jáne qarapaıym tazalyq qaǵıdalaryn saqtaý — zamanaýı qalanyń mádenıetin qalyptastyratyn mańyzdy qundylyqtar. Bul mamandyq ıeleri kóbine kózge kórine bermeıdi. Alaıda dál olardyń kúndelikti eńbeginiń arqasynda elorda turǵyndary taza kóshelerdi, saıabaqtardy jáne qoǵamdyq keńistikterdi paıdalanyp júr, — dedi aktsııa uıymdastyrýshysy Qymbat Baqytkeldi.
Kúni boıy ótken vıktorına merekelik kóńil kúı syılap, eresekter men balalardyń basyn qosty. Qatysýshylar baǵaly syılyqtarǵa ıe bolyp qana qoımaı, ekologııa, elorda tarıhy jáne qorshaǵan ortaǵa jaýapkershilikpen qaraý qaǵıdalary týraly jańa málimetter aldy.
Astana — qarqyndy damyp kele jatqan zamanaýı megapolıs. Onyń tazalyǵy — qala turǵyndarynyń sanaly kózqarasy men kún saıyn tynymsyz eńbek etip júrgen myńdaǵan adamnyń mańdaı teriniń nátıjesi. «Taza sana — taza qala» ekologııalyq vıktorınasy taǵy bir márte taza qala árbir azamattyń jaýapkershiliginen bastalatynyn eske saldy.
