Elordada «Taza Qazaqstan — Taza Astana» baıqaýynyń jeńimpazdary marapattaldy
ASTANA. KAZINFORM — Búgin Astana kúni qarsańynda jáne «Taza Qazaqstan» respýblıkalyq ekologııalyq aktsııasy aıasynda elordada «Astana Tazalyq» JShS uıymdastyrǵan jýrnalıster men blogerlerge arnalǵan «Taza Qazaqstan — Taza Astana» baıqaýynyń qorytyndysy shyǵarylyp, jeńimpazdardy saltanatty marapattaý rásimi ótti.
Baıqaýdyń negizgi maqsaty — jurtshylyqtyń nazaryn ekologııalyq mádenıet máselelerine aýdarý, elordadaǵy tazalyq pen tártipti kún saıyn qamtamasyz etip júrgen kommýnaldyq sala qyzmetkerleriniń eńbegin nasıhattaý, sondaı-aq Astana qalasynyń, onyń qala mańyndaǵy aýmaqtary men eldi mekenderiniń sanıtarııalyq jaǵdaıyn jan-jaqty jarııalaý.
Eki aıǵa sozylǵan baıqaý buqaralyq aqparat quraldary ókilderiniń úlken qyzyǵýshylyǵyn týdyrdy. Qazylar alqasynyń qaraýyna televızııalyq sıýjetter, respýblıkalyq jáne óńirlik baspa jáne ınternet-basylymdardaǵy jarııalanymdar, sondaı-aq áleýmettik jelilerdegi materıaldardy qamtıtyn 142 avtorlyq jumys usynyldy.
Ótken jylmen salystyrǵanda baıqaýǵa qatysýshylar sany edáýir artty. Bul ekologııa, qorshaǵan ortany qorǵaý jáne kommýnaldyq sala qyzmetkerleriniń eńbegi taqyryptaryna degen qyzyǵýshylyqtyń turaqty ósip kele jatqanyn kórsetedi.
Іs-sharaǵa qatysýshylardy «Astana Tazalyq» JShS Bas dırektory Albert Esalıev quttyqtap, Memleket basshysy Qasym-Jomart Toqaevtyń bastamasymen qolǵa alynǵan «Taza Qazaqstan» respýblıkalyq ekologııalyq aktsııasy ekologııalyq mádenıetti qalyptastyrýǵa, qorshaǵan ortaǵa jaýapkershilikpen qaraýdy damytýǵa jáne azamattyq jaýapkershilikti nyǵaıtýǵa baǵyttalǵan mańyzdy qoǵamdyq bastamaǵa aınalǵanyn atap ótti.
— Kúni keshe ǵana qoldanysqa engen jańa Konstıtýtsııa elimizdiń ádiletti ári ornyqty damýynyń jańa kezeńin aıqyndap elorda mártebesi, Qazaqstannyń saıası, ákimshilik jáne qoǵamdyq ortalyǵy retindegi erekshe mártebesin taǵy bir márte bekitti. Osyndaı mańyzdy kezeńde Memleket basshysy Qasym-Jomart Toqaev bastamashy bolǵan «Taza Qazaqstan» aktsııasynyń máni odan ári arta túsedi. Prezıdentimiz tazalyq árbir adamnyń ózinen bastalatynyn birneshe márte atap ótti. Tazalyq — bul tek qalalardyń sanıtarııalyq jaǵdaıy ǵana emes, sonymen qatar mádenıettiń, jaýapkershiliktiń jáne óz úıine, óz qalasyna, óz eline degen qurmettiń kórsetkishi. Búginde qoǵamda ekologııalyq sanany qalyptastyrý asa mańyzdy. Bul baǵytta buqaralyq aqparat quraldarynyń atqaratyn róli erekshe, — dedi Albert Esalıev.
Baıqaý jumystary mynadaı ólshemsharttar boıynsha baǵalandy:
— taqyryptyń ózektiligi jáne qoǵamdyq mańyzdylyǵy;
— materıaldyń mazmunyn ashý tereńdigi men aqparattyń naqtylyǵy;
— materıaldy usyný sapasy, baıandaý stıli men logıkalyq qurylymy;
— avtorlyq kózqaras pen shyǵarmashylyq erekshelik.
Qazylar alqasynyń quramyna buqaralyq aqparat quraldary salasynyń tájirıbeli ári bedeldi ókilderi endi. Baǵalaý qorytyndysy boıynsha ekologııalyq mádenıet, qala tazalyǵy jáne kommýnaldyq qyzmetkerlerdiń eńbeginiń mańyzdylyǵyn jan-jaqty ári kásibı deńgeıde ashqan úzdik jumystar anyqtaldy.
Baıqaýdyń jeńimpazdary men júldegerleri dıplomdarmen jáne estelik syılyqtarmen marapattaldy.
«Astana Tazalyq» JShS ókilderiniń aıtýynsha, «Taza Qazaqstan — Taza Astana» baıqaýyn jyl saıyn ótkizý josparlanyp otyr. Bul bastama aldaǵy ýaqytta da ekologııa, tazalyq, eńbek jáne qalalyq ınfraqurylymdy damytý taqyryptaryn kóteretin jýrnalıster men blogerlerdi qoldaýǵa, sondaı-aq qoǵam, buqaralyq aqparat quraldary jáne kommýnaldyq qyzmetter arasyndaǵy ózara yntymaqtastyqty nyǵaıtýǵa baǵyttalatyn bolady.
Buǵan deıin Astana kúnine oraı elordada qandaı sporttyq is-sharalar ótetinin jazǵanbyz.
