Elordada taıaý kúnderi qoǵamdyq kólikterdiń qozǵalysyna arnalǵan jeke jolaqtar ashylady
ASTANA. QazAqparat - 2015 jyldyń 26 shildesinde Astana qalasynda qoǵamdyq kólikterdiń qozǵalysyna arnalǵan «BUS LANE» jeke jolaqtarynyń birinshi kezeńi iske qosylady. Bul týraly qalalyq ІІD baspasóz qyzmeti habarlady.
Vedomstvonyń habarlaýynsha, búgingi kúni Astana qalalyq ІІD Ákimshilik polıtsııa basqarmasy men «Astana LRT» JShS jáne «SMEÝ-Almaty, Astana» JShS merdiger kompanııalary birlesip jolaqtardy syzý jáne jol belgilerin qoıý jumystarymen aınalysýda.
Jobanyń birinshi kezeńi Abylaı han dańǵylynan bastap Saraıshyq kóshesine deıin B. Momyshuly dańǵyly boıymen jáne Sh. Ýálıhanov kóshesinen Saryarqa dańǵylyna deıin Bógembaı dańǵyly boıymen jasalady.
Astana q. ІІD ÁPB basshysynyń orynbasary Eljan Shópekovtiń aıtýynsha, atalǵan jolaqta avtobýstardy basyp ozýǵa nemese jolyn kesýge bolmaıdy. «Mundaı jolaqtardy iske qosý júrgizýshilerdiń tártibin kúsheıtip, kólik apattaryn azaıtýǵa jáne jalpy qozǵalystyń qaýipsizdigin arttyrýǵa kómegin tıgizedi», - deıdi ol.
«Astana LRT» kompanııasynyń kólik boıynsha dırektory Rýstam Halılevtiń aıtýynsha, atalǵan shara qoǵamdyq kólikterdiń tezirek qozǵalýyna jáne ıntervalyn 30 paıyzǵa deıin qysqartýǵa, avtobýstardyń júrý kestesin qatań saqtaýǵa, qala keptelisin azaıtýǵa septigin tıgizedi.
