Elordada táýliktiń qarbalas shaǵynda qosymsha 7 qoǵamdyq kólik júredi
NUR-SULTAN. QazAqparat – Keıbir qoǵamdyq kólikke adamnyń tolyp ketý problemasyn sheshý úshin CTS kompanııasy qosymsha 7 qoǵamdyq kólikti jolǵa shyǵarmaq, dep habarlaıdy QazAqparat tilshisi.
«Bıyl biz engizip jatqan jańashyldyqtyń taǵy biri – «dáleldi» baǵdarlar dep atalady. Olardyń alǵashqysy №24A baǵdary jolǵa shyǵarylyp ta qoıdy. «Dáleldi» baǵdarlar degenimiz ne? Bizde keıbir avtobýstarda jolaýshylar tasymaly óte tyǵyz keledi. Máselen qalanyń Saryarqa kóshesindegi avtobýstarǵa halyq syımaı qalady. Sol sebepti biz táýliktiń qarbalas shaǵynda qosymsha baǵyty qysqa qoǵamdyq kólikterdi shyǵarýdy usynamyz», - dedi CTS kompanııasy basshysynyń orynbasary Baýyrjan Seıtov «Elordadaǵy qoǵamdyq kólik keshenin damytý: keshe, búgin, erteń» atty kórme-konferentsııasynda.
Onyń aıtýynsha №7A, 8A, 11A, 15A, 24A, 47A, 54A baǵdaryndaǵy avtobýstar osylaısha táýliktiń qarbalas shaǵynda jolǵa shyǵarylady.
«Bul ózgeris qandaı múmkindikterdi beredi? Bul jerde qoǵamdyq kóliktermen qyzmet kórsetýdiń tıimdiligi artyp, avtobýstardy ońtaıly tártipte paıdalanýǵa jol ashylady», - dedi ol.
Eske sala ketsek, búgingi kórme-konferentsııa barysynda Bekmyrza Igenberdınov elordada kámeletke tolmaǵan balalar qalaishilik qoǵamdyq kólikpen tegin júretinin habarlaǵan edi.
Sonymen qatar halyqtyń alty sanatyna kiretin azamattarǵa qala mańy baǵdary boıynsha qoǵamdyq kólik tegin bolady. Ol alty sanattyń ishine zeınetkerler, múgedekter, soǵys ardagerleri, múgedekterdi alyp júrgen adamdar, kópbalaly analar jáne kópbalaly otbasylardyń músheleri kiredi.
