Elordada táýligine 900 adam qabyldaıtyn dıagnostıkalyq keshen salynyp jatyr
ASTANA. KAZINFORM- QR Premer-mınıstriniń birinshi orynbasary Nurlybek Nálibaev Astanadaǵy medıtsınalyq nysandardyń qurylys barysymen tanysty, dep habarlaıdy Úkimettiń baspasóz qyzmeti.
Elorda halqynyń ósýine baılanysty medıtsınalyq ınfraqurylymdy keńeıtý jáne medıtsınalyq qyzmettiń sapasy men qoljetimdiligin arttyrý maqsatynda birqatar joba júzege asyrylyp jatyr. Bıyl №2 qalalyq kópbeıindi aýrýhana janyndaǵy qabyldaý-dıagnostıkalyq keshen men №2 kópbeıindi qalalyq balalar aýrýhanasy janyndaǵy balalar travmatologııalyq pýnkti paıdalanýǵa beriledi.
Memleket basshysy elordadaǵy demografııalyq ósimdi eskerip, medıtsına ınfraqurylymyn damytýdy, medıtsınalyq qyzmetti sapaly ári qoljetimdi etýdi tapsyrǵan bolatyn. Qala halqynyń sany artyp, qoldanystaǵy aýrýhanalar men emhanalarǵa túsetin júkteme kóbeıgendikten, medıtsınalyq mekemeler jelisi de keńeıip keledi.
Nurlybek Nálibaev aldymen perınataldyq ortalyqtyń qurylysymen tanysty. Nysandy kelesi jyly ashý josparlanǵan. 250 tósektik jańa zamanaýı ortalyq júkti jáne bosanatyn áıelderge, sondaı-aq jańa týǵan nárestelerge mamandandyrylǵan kómek kórsetý múmkindigin keńeıtedi. Sonymen qatar qazir jumys istep turǵan bosaný uıymdaryndaǵy júkteme azaıady.
Saryarqa aýdanynda 300 tósektik kópsalaly qalalyq aýrýhananyń qurylysyn aıaqtap, ony ashý josparlanyp otyr. Jańa statsıonar iske qosylǵan soń, elordadaǵy tósek qory ulǵaıyp, eresek turǵyndarǵa mamandandyrylǵan medıtsınalyq kómek qoljetimdi bola túsedi.
№2 qalalyq kópbeıindi aýrýhananyń janynan ashylatyn jańa qabyldaý-dıagnostıkalyq keshende eresekter men júkti áıelderge arnalǵan qabyldaý bólimderi, dıagnostıkalyq qyzmet jáne travmatologııalyq pýnkt ornalasady. Bes qabatty nysan táýligine 700–900 adamdy qabyldaı alady. Munda alǵashqy tekserýden bastap dıagnoz qoıý, ota jasaý jáne emdi jalǵastyrýǵa deıingi shuǵyl kómektiń barlyq kezeńinen bir keshenniń ishinde ótýge bolady. Bul mamandandyrylǵan medıtsınalyq kómektiń qoljetimdiligi men tıimdiligin arttyrýǵa múmkindik beredi.
Keshende kompıýterlik tomografııa, magnıttik-rezonanstyq tomografııa (MRT), rentgenodıagnostıka, angıografııalyq operatsııalyq bólme, operatsııalyq zaldar, ınsýlt ortalyǵy, travmatologııa bólimsheleri, reanımatsııa jáne qarqyndy terapııa bólimsheleri qarastyrylǵan.
Bıyl №2 kópbeıindi qalalyq balalar aýrýhanasynda shuǵyl travmatologııalyq kómek kórsetýge arnalǵan qosymsha ǵımarat ta ashylady. Onda reanımatsııa zaly, operatsııa bólimi, kompıýterlik tomografııa jáne rentgenodıagnostıka kabınetteri jabdyqtalady. Bul jaraqat alǵan balalardy zamanaýı qurylǵylarmen tekserý men emdeý múmkindigin keńeıtip, olardy tıisti bólimderge baǵyttaý tártibin ońtaılandyrýǵa jáne medıtsınalyq kómekti jedel kórsetýge jol ashady.
Byltyr Ulttyq shuǵyl medıtsınany úılestirý ortalyǵynyń bazasynda Esil jáne Nura aýdandarynyń turǵyndaryna arnalǵan balalar travmatologııalyq pýnkti ashylǵan. Onda 10 myńnan astam bala medıtsınalyq kómek alǵan.
Alǵashqy medıtsınalyq-sanıtarııalyq kómek kórsetý jelisi de keńeıedi. Astananyń ósip kele jatqan aýdandarynda bir aýysymda 500 adam qabyldaıtyn úsh jańa emhana salynady. Bul turǵyndardyń turǵylyqty jerinde ýchaskelik dárigerler men beıindi mamandarǵa qaralýyna, dıagnostıkadan jáne profılaktıkalyq tekserýlerden ótýine jaǵdaı jasaıdy.
Jobalar júzege asqan soń, medıtsınalyq qyzmettiń emhanadaǵy qabyldaýdan bastap kópbeıindi statsıonarlyq kómekke deıingi barlyq kezeńin qamtýǵa múmkindik týady.
Osyǵan deıin eldegi medıtsınalyq týrızmniń jyl saıyn 300 mln dollar kiris ákelýi múmkin ekeni týraly jazdyq.
