Elordada táýligine 188 myń tekshe metr sý tazartatyn jańa nysan salynady
ASTANA. KAZINFORM – Elordada sý tapshylyǵynyń aldyn alý jáne ınjenerlik ınfraqurylymdy damytý maqsatynda jańa sý qubyry, káriz júıeleri men tazartý qurylystarynyń qurylysy jalǵasyp jatyr.
Bul týraly Astana qalasynyń ákimi Jeńis Qasymbek málim etti.
Onyń aıtýynsha, aýyz sý tapshylyǵyn boldyrmaý úshin ótken jyly stantsııalarǵa táýligine 50 myń tekshe metr sý jetkizetin tehnıkalyq sý qubyrynyń qurylysy bastalǵan. 2025 jyly 3,2 shaqyrym qubyr tartylsa, bıylǵy bes aıda taǵy 5,8 shaqyrymy salynǵan.
«Aldaǵy jyldary magıstraldy sý qubyry jelilerin salý boıynsha shamamen 20 jobany iske asyrý qajet. Bul jobalar qalany senimdi ári úzdiksiz sýmen qamtamasyz etýge múmkindik beredi», – dedi qala ákimi.
Sonymen qatar byltyr sharýashylyq-turmystyq káriz jelileriniń 10 shaqyrymy jáne eki káriz-sorǵy stantsııasynyń qurylysy aıaqtalǵan. Bıyl taǵy eki káriz-sorǵy stantsııasyn paıdalanýǵa berý josparlanyp otyr.
Qazirgi ýaqytta elordada táýligine orta eseppen 350-360 myń tekshe metr aǵyndy sý shyǵarylady. Osyǵan baılanysty bıyl ónimdiligi táýligine 188 myń tekshe metr bolatyn jańa KTQ-2 káriz tazartý qurylysynyń jáne oǵan qajetti kollektorlardyń qurylysy bastalady.
Sondaı-aq Kóktal, Óndiris turǵyn alaptary men Indýstrııalyq park aýmaǵynda jalpy qýattylyǵy táýligine 85 myń tekshe metr bolatyn jergilikti tazartý qurylystaryn jobalaý jumystary júrgizilip jatyr.
Qaladaǵy nóserli káriz júıesi búginde 20 tazartý qurylysynan, bir jınaqtaý toǵanynan jáne jalpy uzyndyǵy 621 shaqyrym bolatyn magıstraldy kollektorlardan turady.
Sońǵy jyldary 22 shaqyrymnan astam nóserli káriz jelisi salynyp nemese jańǵyrtylyp, toǵyz sorǵy stantsııasy men alty tazartý qurylysy iske qosylǵan.
Qazir Trıatlon parki aýdanyndaǵy TQ 1-4 jáne Aqjol kóshesi boıyndaǵy TQ 6-1 tazartý qurylystaryn salý jáne keńeıtý jumystary júrgizilýde. Bul jobalar Almaty jáne Baıqońyr aýdandaryndaǵy birqatar kóshelerdi sý basý qaýpin azaıtýǵa múmkindik beredi.
Aıta keteıik, Astanadaǵy Máńgilik El men Syǵanaq qıylysynda qozǵalys eki aptaǵa shekteledi.
