Elordada táýelsizdik tarıhynan syr shertetin fotokórme ashylady
ASTANA. 19 qarasha. QazAqparat - 1 jeltoqsan - Qazaqstan Respýblıkasynyń Tuńǵysh Prezıdenti kúni. Osyǵan oraı Astana qalasynda uıymdastyrylyp jatqan merekelik is-sharalar jeterlik. Solardyń biri - Táýelsizdik saraıynda ótetin fotokórme.
Astana qalasy ákimdiginiń resmı saıtynan habarlaǵandaı, buǵan arqaý bolǵan belgili fototilshi Shúkir Shahaıdyń «Elin súıgen, eli súıgen Elbasy» jáne Vladımır Kýrılovtyń «Astana - Elbasynyń tarıhı erligi» atty eńbekteri. Osyǵan oraı uıymdastyrylǵan baspasóz máslıhatynda fotograftar ózderiniń tańdaǵan taqyryptary týraly tarqatyp aıtyp berdi.
Vladımır Kýrılov, fotograf:
«Astananyń boı kóterýi rasynda da úlken tarıhı erlik boldy. Óıtkeni, mundaı erlikke barý kez kelgen adam emes, kez kelgen memleket basshysynyń qolynan kele bermeıdi dep oılaımyn. Astana - ult bolashaǵy, memlekettiń bet-beınesi».
Barlyq sanaly ǵumyryn eliniń tarıhı kezeńderi men tanymal tulǵalaryn sýreti arqyly tanytýǵa arnap kele jatqan fotograf «bul kórmege qoıylǵan jumystar bar eńbegimniń 10 paıyzy ǵana» dep otyr. 150-ge jýyq sýrettiń ishinen Aqorda, Han Shatyr saýda oıyn-saýyq ortalyǵy, Báıterek monýmenti syndy elordanyń kúndizgi, túngi kelisti kelbetin kórýge bolady. Kelem deýshilerge 16 qarasha men 5 jeltoqsan aralyǵynda Táýelsizdik saraıynyń esigi ashyq.
