Elordada Táýelsizdik kúnine oraı birqatar BAQ basshylary men qyzmetkerleri marapattaldy
Joǵarǵy memlekettik nagradany ıesine Aqparat jáne qoǵamdyq damý mınıstri Dáýren Abaev saltanatty túrde tabys etti.
Televızııa salasynda 20 jyldan astam ýaqyt jemisti eńbek etip júrgen belgili jýrnalıst Rınat Dýmanuly kórermenniń kóńilinen shyqqan kóptegen aqparattyq-saraptamalyq baǵdarlamanyń avtory. Sondaı-aq ár aptanyń aıshyqty oqıǵalaryn baıandaıtyn «Jeti kún» baǵdarlamasynyń júrgizýshisi.
Aqparat jáne qoǵamdyq damý mınıstrliginde ótken sharada aqparat salasynyń birqatar qyzmetkeri Úkimet basshysynyń jáne mınıstrdiń alǵys hattaryn aldy.
«Men ózim jýrnalıstıka fakýltetiniń birinshi kýrsyna kelip túsip, jýrnalıstıkamen kásibı túrde aınalysyp kele jatqanyma 20 jyldyń júzi boldy. Osy ýaqyt aralyǵyndaǵy birinshi joǵary memlekettik nagradam eken. Men oılaımyn, bul tek maǵan ǵana emes, sol jýrnalıstıka fakýltetinde tárbıelep bilip bergen ustazdarymnyń eńbegine, «Habar» agenttiginiń barlyq ujymyna berilgen baǵa, úlken senim. Osyndaı eńbegimizdi elep, eskergen Memleket basshysyna, Aqparat jáne qoǵamdyq damý mınıstrliginiń jetekshilerine, ujymyna alǵys bildirgem keledi. Táýelsizdik jyldarynda elimizdiń aqparat salasy úlken dárejege kóterilip, bıik belesterdi baǵyndyryp jatyr. Tek eldiń ishinde emes, halyqaralyq deńgeıde de kóptegen jetistikterge jetý ústinde. Bunyń ózi osy aqparat salasynda saıasattyń tereń deńgeıde júrgizilip, ulttyq múdde turǵysynan zamanǵa saı atqarylyp jatqany dep bilemiz. Elimizdiń eń ulyq merekesi, eń basty merekesi – Táýelsizdik merekesi qarsańyda osyndaı marapatqa ıe bolý men úshin maqtanysh jáne jaýapkershilik dep sanaımyn»,-dedi «Habar» agenttigi» AQ tóraǵasynyń birinshi orynbasary Rınat Kertaev.
