Elordada «Taý men dala hıkaıasy» taqyrybynda Aıtmatov oqýlary ótti
NUR-SULTAN. QazAqparat - Elordamyz Nur-Sultanda Qazaqstan halqy assambleıasynyń uıymdastyrýymen álem ádebıetiniń klassıgi Shyńǵys Aıtmatovqa arnalǵan «Taý men dala hıkaıasy» atty shyǵarmashylyq kesh ótti, dep habarlaıdy QazAqparat Nur-Sultan qalasy Qazaqstan halqy Assambleıasyna silteme jasap.
«Qyrǵyzstan - Astana» etnomádenı birlestiginiń bastamasymen ótken is-sharaǵa arnaıy Qyrǵyzstannan kelgen jazýshy, qoǵam qaıratkeri, Shyńǵys Aıtmatovtyń týǵan qaryndasy Aıtmatova Rozetta Tórequlqyzy qatysty.
Aýqymdy is-shara barysynda Nur-Sultan qalasyndaǵy №79 mektep-lıtseıinde Sh.Aıtmatovtyń murajaıy ashylyp, R.Aıtmatova murajaıdyń ashylý saltanatyna qatysqan qaýymǵa jáne mektep oqýshylary men muǵalimderge aǵasy Sh.Aıtmatovtyń ómiri týraly qyzyqty derekter aıtyp berdi.
Shyǵarmashylyq kesh Q.Qýanyshbaev atyndaǵy Memlekettik akademııalyq qazaq mýzykalyq drama teatrynda qoıylǵan Shyńǵys Aıtmatovtyń «Qyzyl oramaldy shynarym» spektaklimen jalǵasty. Akterlerdiń shynaıy, sheber oıynyna tamsanǵan spektakl kórermenderi kózderine jas alyp, qoıylymnyń uıymdastyrýshylaryna jyly lebizderin bildirdi.
Sondaı-aq, is-shara aıasynda elordamyzdyń Dostyq úıinde «Shyńǵys Aıtmatov. Dáýir. Tulǵa. Gýmanızm» atty halyqaralyq esse baıqaýy men «Manas Aalamy» atty jas manasshylar baıqaýynyń jeńimpazdaryn marapattaý rásimi, Qazaqstan halqy assambleıasy tóraǵasynyń orynbasary, QHA Hatshylyǵynyń meńgerýshisi J.Túımebaevtyń qatysýymen «Taý men dala hıkaıasy» atty sýretshiler kórmesi jáne qazaq-qyrǵyzǵa ortaq tulǵa Shyńǵys Aıtmatovtyń shyǵarmashylyǵyna arnalǵan dóńgelek ústel ótti.
Dóńgelek ústel barysynda qyrǵyz jazýshysy Shyńǵys Aıtmatovty barsha qazaq eli erekshe qurmet tutyp, joǵary baǵalaıtynyn atap ótken J.Túımebaev: «Aty ańyzǵa aınalǵan Adamzattyń Aıtmatovy ómir boıy qazaq jazýshysy Muhtar Áýezovti pir tutyp, zamandastary Qaltaı Muhamedjanov, Muhtar Shahanov, Oljas Súleımenov, Zeınolla Qabdolov, Sherhan Murtazamen dostyq qarym-qatynasta etene aralasty. Qazaq eli qyrǵyz jazýshysynyń shyǵarmashylyǵyn joǵary baǵalap, Qazaqstannyń halyq jazýshysy ataǵyn berdi. Qazirgi sátte Nur-Sultan qalasynda Sh.Aıtmatov atyndaǵy kóshe bar. Arqa tórindegi búgingi keshtiń júzege asýy da halyq jazýshysyna degen erekshe qurmetten týsa kerek» - dep túıindedi.
Belgili qoǵam qaıratkerleri, qazaq-qyrǵyz jazýshylary, Qazaqstan halqy Assambleıasynyń músheleri, etnomádenı birlestikter men jastar qanatynyń ókilderi qatysqan búgingi is-sharaǵa joǵary baǵa berip, Alataýdyń eki betin en jaılaǵan qazaq-qyrǵyz halyqtarynyń dostyǵy nyǵaıa túsýine septigin tıgizetin osyndaı keshti uıymdastyrǵan elordalyq Assambleıaǵa, alǵys bildirdi.
Aıta keteıik, osyǵan deıin elordadaǵy mektepte Shyńǵys Aıtmatov murajaıy ashylatyndyǵyn habarlaǵanbyz.
