Elordada tastandy balalar azaıdy
ASTANA. QazAqparat - Sońǵy jyldary elordada balalar úıine bala tapsyrý azaıdy, dep málim etti qalalyq mamandandyrylǵan balalar úıiniń dırektory Sáýle Kenjebaeva. Bul týralyAstana ákimdigi medıa ortalyǵy habarlady.
«2017 jyldyń alǵashqy alty aıynda bizdiń mekemedegi 44 bala otbasy men týystaryna qaıtty. Eń bastysy tórt jastan asqan soń birde-bir balany balalar úıine aýystyrǵan joqpyz», - deıdi S.Kenjebaeva.
Onyń aıtýynsha, mamandandyrylǵan balalar úıinde balalar tek tórt jasqa deıin bola alady. Al ol jastan asqandary belgilengen tártipke sáıkes balalar úıine aýystyrylyp, kámelettik jasqa tolǵanǵa deıin sonda tárbıelenedi. Sońǵy jyldary balalarynan bas tartýshy ata-analardyń azaıǵany baıqalady.
«Árıne, bul oń úrdis memlekettiń ustanyp otyrǵan salıqaly saıasatynyń arqasynda bolyp otyr. Óıtkeni qazir áıelderge qoldaý kórsetetin daǵdarys ortalyqtary men analar úıleri bar. Bul ortalyqtar tájirıbe júzinde óz tıimdiligin dáleldep otyr», - dedi balalar úıiniń dırektory.
