Elordada taraptardyń tatýlasýymen aıaqtalǵan azamattyq ister sany artyp keledi
ASTANA. QazAqparat - Elordada taraptardyń tatýlasýymen aıaqtalǵan azamattyq ister sany artyp keledi. Bul týraly búgin Astana qalasynyń mamandandyrylǵan aýdanaralyq ekonomıkalyq sotynyń sýdıasy Aıgúl Jamansarıeva málim etti, dep habarlaıdy QazAqparat.
«2016 jyldyń 9 aıdyń kórsetkishine súıensek, Astana qalasynyń mamandandyrylǵan aýdanaralyq ekonomıkalyq sotyna 12 005 talap túsken. Onyń ishinde sotta qaralǵan 8 553 talap-aryz boıynsha sot sheshimi, al 883 is boıynsha sot buıryǵy shyǵarylǵan. 1 070 azamattyq is boıynsha óndiris toqtatylǵan. Onyń ishinde jartysynan kóbi taraptardyń kelisimi boıynsha toqtatylyp otyr. Bul Astana qalasy sottarynyń ishindegi eń joǵarǵy kórsetkishterdiń biri bolyp sanalady»,- dedi ol.
Onyń aıtýynsha, sotta kelisimge kelý protsedýralaryn belsendi qoldanýǵa baǵyttalǵan sharalar qoldanyldy. Nátıjesinde eger 2015 jyly 136 azamattyq is boıynsha taraptar medıatsııa tártibimen kelisimge kelse, al osy jyly ol kórsetkish 480-ge deıin ósken.
«Jańa QR Azamattyq protsestik kodeksi boıynsha medıatsııalyq kelisimdi tek medıatorlar ǵana emes, sonymen qatar taraptardyń ótinishhaty boıynsha sýdıa ótkize alady. Sol sebepti qazirgi ýaqytta daýdy medıatsııa tártibimen retteý týraly kelisimge kelý arqyly toqtatylǵan azamattyq isterdiń ósýi baıqalyp otyr. Sot óndirisine qabyldaý kezinde sotpen qaıtarylatyn talap-aryzdardyń sany edáýir qysqardy. Bul tendentsııa jańa Azamattyq protsestik kodeks boıynsha eger sotqa deıingi is júrgizý satysyndaǵy kemshilikterdi joıý múmkin bolmaıtyn jaǵdaı anyqtalsa, aryz qaıtarylýǵa jatatyndyǵymen túsindiriledi. Kóbinese aryzdardyń qaıtarylýy olardyń sottyń qaraýyna jatpaıtyndyǵyna negizdeledi»,- dedi Jamansarıeva.
