Elordada tanymal sýretshi Sahı Romanovtyń kórmesi ótedi
ASTANA. QazAqparat - QR Bilim jáne ǵylym mınıstrliginiń «Daryn» ǵylymı-praktıkalyq ortalyǵy «Nuralash» qoǵamdyq qorymen birlese otyryp búgin, 29 mamyrda Astana qalasynyń Oqýshylar saraıynda tanymal qazaqstandyq sýretshi Sahı Romanovtyń shyǵarmalarynyń kórmesin ótkizedi.
Ózindik ulttyq órnegi mol Sahı Romanovtyń shyǵarmalarynyń «tamyry» tym tereńde, sýretshiniń ómirdi tereń sezinýinen, bolmyspen tikeleı aralasýynan týyndaǵan. Oǵan Otan beınesi halyq ómiriniń dástúrli tynys-tirshiligimen nemese boıaýlardyń belgili bir jarasymdy úılesimen anyqtalmaıdy. Ol beıne týǵan jerdiń tynysyn tereń túsinýden, onymen únemi úzilmeıtin jandy baılanysty sezinýden týyndap otyrady. Sahı shyǵarmalarynyń mazmundy bolýy tabıǵatyn jandy sulýlyǵyn shyn máninde asqaq sezine bilýinen, sondaı-aq, ishki oı-sezimin, kóńil-kúıin dóp basyp jetkize alatyn sheberliginen dep uǵynǵan jón.
Sahı Romanov sýretshi ǵana emes, eliniń asyl muratty azamaty. Balalyq shaǵy aýyr qıynshylyqta ótken ol ómirge sonshalyqty qushtar-aq. Kún nuryna malynyp, tósinde eńbek dúbiri qaınap jatqan týǵan jerin, onyń beıbit ómirin ol ińkárlikpen súıedi. Ol árqashanda aspannyń ashyq, adamdardyń baqytty bolýyn kórgisi keledi, halqynyń jasampaz eńbektegi tabystaryn zor maqtan tutady.
Sýretshi shyǵarmashylyǵynyń ózindik ereksheligi týǵan jerinen nár alyp, tamyrlanyp «óz boıynan» taraýda, al azamattyǵy - týǵan jeriniń taǵdyrymen birge ekenin júregimen sezinedi. Kórme 2014 jyly 29 mamyrda saǵat 17.00-de Astana qalasynyń oqýshylar saraıynda ótedi, dep habarlady «Daryn» Respýblıkalyq ǵylymı-praktıkalyq ortalyǵynan.
