Elordada tanymal ǵalym Myrzataı Joldasbekovtiń kitaptary tanystyryldy
Atap aıtqanda, atalǵan eki basylym túrkologııa salasyna qosylǵan baǵaly eńbekter sanalady. «Qorqyt Ata kitabynyń» Myrzataı Joldasbekovtiń Gúlim Shádıevamen birlesip jasaǵan aýdarmasynda áıgili tarıhı shyǵarma Drezden nusqasy boıynsha tuńǵysh ret qazaq tiline tolyq aýdarylyp, transkrıptsııasy men sózdigi qosa usynylyp otyr. Al «Uly Dala ádebıeti» monografııasynda kóne túrki jazba eskertkishterine qatysty zertteýlermen qosa, qazaq aýyz ádebıetiniń birqatar muralary týraly eńbekter qamtylǵan.
«Osy eki kitap meniń ómir boıy zerttep júrgen eńbekterim. «Uly Dala ádebıeti» kitabyn halyqtyń synyna shyǵardym, bul 60 jylǵy eńbegim. Óte qýanyshtymyn, bir jınaqtalyp, bir kitapta qamtyldy. Al ekinshi kitapqa toqtalsam, Gúlim Shádıeva qaryndasymmen birlese burynǵy túrki eskertkishterin jańashalaý tájirıbemdi paıdalanyp, tórt jyldyń bederinde osy «Qorqyt Ata kitabyn» qazaqsha jańashalap shyǵardym», - dedi M. Joldasbekov.
Tanystyrylym barysynda QR Memlekettik hatshysy Qyrymbek Kósherbaev ultymyzdyń rýhanı qazynasy taǵy bir taǵylymdy ári tanymdy eńbektermen tolyǵyp otyrǵanyn atap ótti.
«Sondyqtan «Uly Dala ádebıeti» kitaby asyl muramyzdy urpaqqa aman-esen jetkizýde aıanbaı ter tógip kele jatqan Myrzataı aǵamyzdyń belsendi áreketiniń jemisi ári jeńisi dep baǵalaımyz. Jalpy, osy kitaptardy óskeleń urpaq úshin baǵa jetpes rýhanı baılyq deımiz. Osy eńbekter halyqtyń ıgiligine jaraı bersin dep tilek aıtamyz», - dedi Q. Kósherbaev.
Óz kezeginde Úkimet basshysynyń orynbasary Berdibek Saparbaev mádenıet, ádebıet jáne óner, sport salalary árbir ultty, memleketti tanytatyn mańyzdy baǵyt ekenin atap ótti.
«Bizdiń ǵalymdarymyz, tarıhshylarymyz kóbirek zerttep, osyndaı eńbekterdi jarııalasa, onda bizdiń ultymyzdyń bolashaǵyna degen senim myǵym bolady. Myrzataı aǵanyń kitaptary bolashaq urpaqqa arnalǵan úlken ǵylymı eńbek. Bul kitaptar bizdiń tarıhymyz tereńde jatqanyn aıqyn kórsetip otyr», - dedi B. Saparbaev.
Sonymen qatar osy shara barysynda Mádenıet jáne sport mınıstri Aqtoty Raıymqulova Parlament Senatynyń Tóraǵasy Darıǵa Nazarbaevanyń quttyqtaý sózin oqyp berdi.
«Taǵylymy mol taǵdyryńyz kópke úlgi. Egemen elimizdiń syndarly saıasatyn damytyp, bedelin arttyrýǵa, tarıhyn tolǵap, memlekettigin nyǵaıtýǵa qosqan úlesińiz zor. Adam ómiriniń maǵynaly da, mazmundy tustary damylsyz atqarǵan eńbektiń qasterli belesteri men adamdyq adaldyǵymen ólshenedi. Búgingi «Uly Dala ádebıeti» men «Qorqyt Ata kitabynyń» jaryqqa shyǵýy da sol beınetti eńbek jolyndaǵy jetistikterińizdiń baǵamy. Bul týyndylaryńyz tereń zerdelenip, bolashaq urpaqqa tartý retinde úlken eńbekpen kelgen dúnıe ekenin uǵynamyz. Osy joldaǵy shyǵarmashylyq shabytyńyz sarqylmasyn», - delingen D. Nazarbaevanyń quttyqtaýynda.
