Elordada Taldykól kólin qoqystan tazartý ekologııalyq aktsııasy ótti
NUR-SULTAN. QazAqparat – Elordada Taldykól kólin qoqystan tazartý ekologııalyq aktsııasy ótti, dep habarlaıdy QazAqparat tilshisi.
Bastama «Taldykól kólin saqtaý jónindegi jastar bastamasy» jobasy aıasynda júzege asyryldy. Jobany júzege asyrý úshin uıymdastyrýshylar buǵan deıin pandemııa jaǵdaıynda senbilik uıymdastyrý, úıde qatty turmystyq qaldyqtardy suryptap jınaý júıesin engizý taqyryptarynda onlaın trenıngter ótkizdi.
Eko-aktsııa BUU Bas assambleıasy jarııalaǵan ekojúıeni qalpyna keltirý onjyldyǵyn qoldaý maqsatynda uıymdastyryldy.
Uıymdastyrýshylar senbilikke qajetti qoqys salatyn qaptar, kúrekter jáne qolǵaptarmen qamtamasyz etti. Іs-sharaǵa Nur-Sultan qalasynyń barlyq belsendi turǵyndary qatysty.
«Biz Taldykól kólinde arnaıy aktsııa jasadyq. Qaýymdastyq retinde biz kóldiń bastapqy tabıǵı túrin saqtap qalý úshin jumys istep jatyrmyz. Osy oraıda Nur-Sultan qalasynyń ákimdiginiń de bul iste járdem beretinine úmittenemiz», - dedi is-shara barysynda Qazaqstannyń Ekologııalyq uıymdary qaýymdastyǵynyń tóraıymy Aıgúl Soloveva.
Aıta keterligi, is-sharany Nur-Sultan qalasy ákimdigi, Eýrazııa qory ókiliniń qoldaýymen «Saltanat Raqymbekova atyndaǵy qory» Qoǵamdyq uıymy uıymdastyrdy.
