Elordada taksı júrgizýshisin óltirgen qanypezerler quryqtaldy
ASTANA. 17 mamyr. QazAqparat /Jasulan Amanbaıuly/ - Elordada taksı júrgizýshisin óltirip, kóligin aıdap áketken qylmyskerler 3 saǵattyń ishinde quryqtaldy.
Bul týraly búgin brıfıngte Astana qalalyq ishki ister departamenti memlekettik til jáne aqparat bóliminiń bastyǵy Nurdildá Oraz málim etti.
30 jastaǵy taksı júrgizýshisiniń máıiti zorlyq-zombylyq kórsetý belgilerimen 7 mamyr kúni tabylǵan bolatyn. Alaıda qanypezerler uzaqqa deıin jasyryna almady. Jedel aqparat túsisimen, polıtseıler taksı júrgizýshisiniń kóligin baza arqyly anyqtap, oǵan shuǵyl túrde izdeý saldy. Operatsııa barysynda qylmyskerler 3 saǵattan soń aıdap áketilgen kólikpen ketip bara jatqan tusynan ustaldy.
N. Orazdyń aıtýynsha, sol kúni «M» esimdi azamat óziniń jeke kóligimen túni boıy taksı qyzmetin kórsetip júrip, kólik toqtatyp turǵan eki er adamdy aparyp tastaýǵa kelisimin bergen.
«Jolaýshylardyń bireýi Astana qalasynda turady, ekinshisi elorda mańyndaǵy Astrahanka eldi mekeninen. Jolaýshylar qylmystyq kelisimge kelip, tonaý maqsatynda taksı júrgizýshisine shabýyl jasaýdy uıǵarady. Bireýi artqy oryndyqta otyryp, júrgizýshini qylqyndyrady, al onyń sybaılasy aldyńǵy jaqta otyryp, onyń aıaqtaryn ustap turady. Osylaısha, olar ólgen adamnyń máıitin dalaǵa tastap, onyń uıaly telefonyn alyp, kóligin aıdap áketken»,-deıdi oqıǵanyń mán-jaıyna toqtalǵan N. Oraz.
