Elordada taksı júrgizýshilerin aldaýyna túsirip, shyǵynǵa ushyratyp kelgen alaıaq jigit ustaldy
NUR-SULTAN. QazAqparat – Elordalyq polıtsııa departamentiniń krımınaldyq polıtsııa bóliminiń qyzmetkerleri alaıaq er adamdy ustady, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.
Jedel-izdeý sharalaryn júrgizý kezinde buryn alaıaqtyq jasaǵany úshin qylmystyq jaýapkershilikke tartylǵan 26 jastaǵy er adam ustaldy.
Elordanyń polıtsııa qyzmetine taksı júrgizýshilerinen 6 aryz kelip tústi. Olar klıenttiń ózderin aldap, 5-15 myń kólemindegi aqshany ıemdenip alǵanyn aıtty.
Jábirlenýshilerdiń barlyǵy bir shemamen aldandy. «Klıent» mobıldi qosymsha arqyly meken-jaıǵa sálemdeme jetkizý úshin taksı shaqyrtty. Áńgime barysynda ol júrgizýshiden aqsha alyp, jetkizý kezinde onymen sálemdemeni satyp alýshy esep aıyrysatynyn ýáde etken. Oǵan kelisken taksı júrgizýshileri atalǵan meken-jaıǵa kelip, sálemdemeni satyp alýshylardy tappaǵan soń, «klıentke» habarlasqanda, ol telefonyn óshirip tastaǵan.
Qazirgi ýaqytta barlyq faktiler boıynsha Qazaqstan Respýblıkasy Qylmystyq kodeksiniń 190-babymen (alaıaqtyq) tergeý júrgizilýde. Polıtseıler alaıaq áreketinen zardap shekken taksı júrgizýshileri áldeqaıda kóp bola alatynyn atap ótýde. Jábrlenýshilerdi Nur-Sultan qalasy «Almaty» aýdandyq polıtsııa basqarmasyna (Jansúgirov kóshesi,2) kelýin nemese 8(7172) 71-67-10, 71-67-11 jáne 102 telefon nómirlerine habarlasýy kerek.
