Elordada taǵy tórt adam torttan ýlandy
NUR-SULTAN. QazAqparat - Nur-Sultan qalasynyń Qoǵamdyq densaýlyq saqtaý departamentiniń basshysy Sádýaqas Baıǵabylov taǵy da tórt adamnyń «Happy Cake» tortymen ýlaný jaǵdaıyna qatysty túsinik berdi, dep habarlaıdy QazAqparat tilshisi.
Habarlanyp otyrǵandaı, «Happy Cake» ónimderinen ýlanyp, qalanyń ınfektsııalyq aýrýhanasyna túsý jaǵdaılary jalǵasýda.
«Qosymsha taǵy «Happy Cake» óndirgen «Qus súti» tortyn tutynýǵa baılanysty ishek ınfektsııasynyń tórt jaǵdaıy tirkeldi», - deıdi Sádýaqas Baıǵabylov.
Aldyn ala anyqtalǵanyndaı, 14 sáýir kúni elordadaǵy otbasylardyń biri týǵan kúnin toılaǵan. Otbasynyń otanasy Kúıshi Dına kóshesi 13-shi mekenjaıda ornalasqan «Happy Cake» óndirýshisinen «Qus súti» tortyna tapsyrys bergen. Zardap shekkenderdiń tórteýi de «Qus súti» tortyn jegen.
«Zardap shekkenderdiń úsheýi 17 sáýir kúni temperatýrasy kóterilip, ishi aýyryp, qusyp, dıareıamen aýrýhanaǵa tústi. Zardap shekkenderdiń biri ambýlatorııalyq em alyp jatyr», - deıdi ol.
Qazirgi ýaqytta zardap shekkenderdiń sany onǵa jetken. Olardyń toǵyzy eresek, bireýi bala. 8 naýqas emdi statsıonarlyq tártipte, al ekeýi ambýlatorııalyq tártip boıynsha alyp jatyr.
Sapasyz ónimdi tutynǵannan bastap tamaqtan ýlaný jaǵdaıynyń alǵashqy belgileri birneshe saǵattan bastap 7 kúnniń ishinde de baıqalýy múmkin.
«Osyǵan baılanysty aýyryp qalǵandar apta boıy ınfektsııalyq aýrýhanaǵa túsip jatty. Olardyń kóbi úıde ózdiginen emdelmek bolǵan. aqyry, jaǵdaılary jaqsarmaǵannan keıin jedel járdem shaqyrǵan. Aptanyń sońyna deıin taǵy da mundaı jaǵdaılar ábden qaıtalanýy múmkin», - deıdi Sádýaqas Baıǵabylov.
Eske sala ketsek, úsh kún buryn elordada bir otbasy «Happy Cake» tortynan ýlanyp qalǵan bolatyn.
Arada kóp ýaqyt ótpeı qalalyq qoǵamdyq densaýlyq saqtaý deparatmentiniń basshysy Sádýaqas Baıǵabyl «Happy Cake» tortynan ýlaný jaǵdaıy taǵy da tirkelgenin habarlaǵan edi.
