Elordada taǵy eki óńir aýylsharýashylyq jármeńkelerin ótkizedi
NUR-SULTAN. QazAqparat – 21-22 qyrkúıek kúnderi Nur-Sultanda Aqtóbe jáne Qyzylorda oblystarynyń taýar óndirýshileri aýylsharýashylyq jármeńkesin ótkizedi, dep habarlaıdy QazAqparat.
«Han Shatyr» saýda, oıyn-saýyq ortalyǵynyń janynda ótetin jármeńkege Aqtóbe oblysynyń 12 aýdanynan – 20 taýar óndirýshisi jáne Qyzylorda oblysynyń 7 aýdanynan 70 kásiporyn qatysady.
«Elimizdiń batys aımaǵy elordaǵa 214 tonna ónimin ákeledi dep josparlanyp otyr: ettiń barlyq túri - 65 tonna, kartop pen kókónister - 85 tonna, sút ónimderi - 10 tonna, ósimdik maıy - 5 tonna, jumyrtqa - 13 myń dana, balyq - 3 tonna, bal - 0,5 tonna, shujyqtar - 5 tonna, un men makaron ónimderi - 6 tonna, alkogolsiz sýsyndar - 6 tonna, basqa da ónimder - 16 tonna. Aqtóbe oblysynyń «Aıs» JShS, «Agrofırma Taý» JShS, «Martýk Sút» JShS sút ónimderin, «Shyńǵys» HK, «Shekshek ata» ÁKK, «Abylaı» HK jáne basqalar ulttyq sút sýsyndaryn usynady, al «Novo-Aldjanskıı dıirmeni» JShS, «Aqtóbe-nan» JShS un, un jáne makaron ónimderin, «Aıbek» ÁKK, «Stepnoe» JShS, «Rokos» JShS shujyqtar men et taǵamdaryn, «Izet Greenhouse» jáne «Greenhouse Kazakhstan» JShS kókónisterdiń túr-túrin usynady», - delingen elorda ákimdiginiń habarlamasynda.
Al Qyzylorda oblysy 270 tonna bolatyn 40-tan astam taýar túrin ákelmek: kúrish - 80 tonna, sút ónimderi - 4 tonna, balyq - 16 tonna, kókónister - 15 tonna, jemister - 3,5 tonna, qaýyn-qarbyz, asqabaq - 145 tonna, as tuzy - 10 tonna jáne taǵy basqalary. Qyzylorda óńiriniń «Syr Marjany» JShS, «Dostyq-Jer» JShS, «Aqjarma ı K» JShS jáne «Agroholdıng Baıqonyr» JShS kúrish ónimin, «Aral» SDO, «Qýanysh» JShS, «AR-N-KON» JShS, «ASTO» JShS, «Qyzylorda Balyq» JShS, «Igılıkov», «Qoshqarbaev», «Kóshekbaev», «Karaev» jeke kásipkerleri balyq jáne balyq ónimderin, «Arýana» JShS jáne «Seıtenova» jeke kásipkerligi sút ónimderin, «Maıdakól», «Aqjona» aýyldyq okrýgterinen, «Rahman» sharýa qojalyǵynan, «Jaıylma» aýyldyq okrýginen, JK «Altynbekova» jáne taǵy basqa jeke kásipkerler baqsha ónimderin usynady.
Jalpy, eki aımaq Nur-Sultanǵa 484 tonna ónim ákeledi. Dástúr boıynsha shara aıasynda ártister men ánshiler óner kórsetedi.
Aıta keteıik, 31 tamyz kúni bastalǵan el óńirleriniń aýylsharýashylyq jármeńkeleri 27 qazanǵa deıin jalǵasady. Buǵan deıin óz ónimderin Túrkistan oblysynyń, Almaty jáne Qostanaı oblystarynyń, Pavlodar oblysynyń taýar óndirýshileri óz ónimderin usynǵan bolatyn.
