Elordada taǵy bir PTR zerthana ashyldy
NUR-SULTAN. QazAqparat – Elordada «UMC» korporatıvtik qorynyń Respýblıkalyq dıagnostıkalyq ortalyǵynda koronavırýs ınfektsııasyn anyqtaıtyn jańa PTR zerthana ashyldy, dep habarlaıdy QazAqparat tilshisi.
«Mundaı zerthananyń ashylýy COVID 19 indetimen kúreste mańyzdy qadam sanalady. Óıtkeni, PTR-testileý arqyly adam aǵzasynda vırýstyń bar-joǵy anyqtalady. Jáne ol dıagnozdy zerthanalyq rastaý úshin qajet. Bıomaterıal retinde jutqynshaq pen muryn qýysynyń qosylǵan jerinen alynatyn juǵyndy paıdalanylady. Saraptama quny 14 myń teńge, materıaldy alý 1 myń teńge», delingen Qor taratqan habarlamada.
PTR testileý úshin «UMC» korporatıvtik qorynyń umc.org.kz saıtynda saýalnama toltyrý kerek. Sosyn Baılanys ortalyǵynyń mamandary habarlasyp, patsıentti zertteýge jazady.
Respýblıkalyq dıagnostıkalyq ortalyǵy ǵımaratynda barlyq sanıtarlyq-epıdemıologııalyq normalar saqtalǵan. Ózge naýqastardyń qaýipsizdigin qamtamasyz etý úshin zerthanaǵa bólek esikten kiredi. Sondaı-aq, medıtsına qyzmetkerleri úshin barlyq tıisti qorǵanys sharalary qarastyrylǵan.
