Elordada taǵy bir kóshege Bus Lane jolaǵy engiziledi
NUR-SULTAN. QazAqparat – Nur-Sultan qalasynda taǵy kóshe boıyna Bus Lane jolaǵy engizilmek, dep habarlaıdy QazAqparat tilshisi.
«29 tamyzdan bastap Abylaı han dańǵylynda Pýshkın kóshesinen Manas kóshesine deıingi jol ýchaskesinde ýaqyttyq shekteýmen, qoǵamdyq kólikke arnalǵan jolaq (Bus Lane) engiziledi. Ondaǵy maqsat – avtobýspen qatar jedel járdem, arnaıy jáne órt sóndirý qyzmetiniń qozǵalysyn qamtamasyz etý. Sonymen qatar, atalǵan jolaqpen belgili ýaqytta jeńil avtokóliktiń de júrýine ruqsat berilmek. Degenmen avtobýstan basqa kólikterge keptelis ýaqytynda júrýge bolmaıdy. Atap aıtqanda, tańǵy saǵat 07:30 -dan 9.30 -ǵa deıin jáne saǵat 17:00 -den 20:00-ge deıin ýaqyt aralyǵy», - dedi CTS (City Transportation Systems) JShS-nyń Qoǵammen baılanys departamentiniń jetekshisi Naýat Azanbaeva.
Onyń aıtýynsha, atalǵan shara 2020-2021 jyldarǵa arnalǵan elordada jol qozǵalysyn basqarýdy jaqsartý men jol qaýipsizdigin arttyrýdyń keshendi jospary aıasynda júzege asyp otyr.
