Elordada taǵy úsh mektepte ınklıýzııany qoldaý kabınetteri ashyldy

ALMATY. KAZINFORM – Bas qaladaǵy №23, №29 jáne №60 mektepterde ınklıýzııany qoldaý kabınetteri ashyldy. Bul týraly Astana ákimdiginiń baspasóz qyzmeti habarlady. 

– Osylaısha, Astana mektepterindegi mundaı keńistikterdiń jalpy sany 21-ge jetti. Nátıjesinde 1 054 erekshe bilim berý qajettilikteri bar oqýshy zamanaýı jaǵdaılarda bilim alyp, beıimdelý múmkindigine ıe boldy, - delingen habarlamada. .

Inklıýzıvti kabınetter quramyna logoped, defektolog jáne psıholog bólmeleri, qysh sheberhanasy men emdik dene shynyqtyrý kabıneti kiredi. Bul arnaıy aımaqtar balalardyń qajetti daǵdylaryn damytýǵa, sondaı-aq mektep ortasynda qurdastarymen birge áleýmettenýine yqpal etedi. Mundaı format dástúrli bilim berý men túzetý sabaqtaryn biriktirip, oqytýdy qoljetimdi ári jaıly etedi. 

Aıta keterligi, ınklıýzııa kabınetterinde erekshe balalardyń qabiletine qaraı erte kásiptik mamandyqtarǵa beıimdeý jobalary da engizilip jatyr. Bul bastama olardyń bolashaqta eńbek naryǵyna daıyndalýyna, áleýetin tolyq ashýyna jol ashady. Joba tujyrymdamasy «Samruk-Kazyna Trust» korporatıvtik qorynyń qoldaýymen ázirlenip, júzege asyrylyp keledi. 

Qor ınklıýzııa salasyndaǵy otandyq sarapshylarmen birlesip, balalarǵa teń múmkindikter jasaýǵa baǵyttalǵan júıeli jumystardy atqaryp keledi.