Elordada taǵy eki kóshede kólik júrýine tyıym salyndy
ASTANA. KAZINFORM — Astanada Eńlik-Kebek jáne Sulýkól kósheleri jabylatyn boldy.
Astana qalasynyń kólik jáne jol-kólik ınfraqurylymyn damytý basqarmasy Sulýkól kóshesiniń Eńlik-Kebek kóshesinen bastap Ardagerler kóshesine deıingi ýchaskesinde jol jóndeý jumystary júrgiziletinin habarlaıdy.
Osyǵan baılanysty 30 jáne 31 tamyzda joǵaryda atalǵan ýchaske tolyǵymen jabylady.
Sondaı-aq Eńlik-Kebek kóshesiniń Bolashaq kóshesinen bastap Beıbarys Sultan kóshesine deıingi ýchaskesinde de ortasha jol jóndeý jumysy bastalady.
Bul ýchaske 29-30 tamyz kúnderi tolyǵymen jabylady.
«Elorda turǵyndary men qonaqtarynan qala joldarynda keptelis bolmas úshin óz marshrýtyn aldyn ala josparlaýdy suraımyz. Ýaqytsha qolaısyzdyq úshin keshirim suraımyz jáne jol-qurylys jumysyn júrgizýge túsinistikpen qaraýdy ótinemiz» dep eskertedi ákimdikten.
Munyń aldynda Astanada Máńgilik el men Saraıshyq qıylysyndaǵy jolaıryq jabylǵanyn habarlaǵan edik.
