Elordada taekvondodan Altaı Odaǵy chempıonatynyń ashylý saltanaty ótti
ASTANA. KAZINFORM - Astanadaǵy Jaqsylyq Úshkempirov atyndaǵy jekpe-jek saraıynda taekvondodan Altaı Odaǵy chempıonatynyń shymyldyǵy túrildi.
Saltanatty rásimge Týrızm jáne sport mınıstri Erbol Myrzabosynov, Dúnıejúzilik taekvondo federatsııasynyń Prezıdenti doktor Chýngvon Choý, Qazaqstan taekvondo (WT) federatsııasynyń Prezıdenti Kýdrát Shamıev, sondaı-aq halyqaralyq sport qaýymdastyǵynyń ókilderi men jankúıerler qatysty.
Erbol Myrzabosynov týrnırdiń elordada ótýi Qazaqstandaǵy taekvondo sportynyń damýyna serpin beretinin atap ótip, qatysýshylarǵa sáttilik tiledi.
-Altaı Odaǵy chempıonatynyń Astanada ótýi — elimiz úshin mańyzdy sporttyq oqıǵa. Týrnır halyqaralyq yntymaqtastyqty nyǵaıtyp qana qoımaı, jas sportshylarǵa úlken tájirıbe alańy bolmaq. Barlyq qatysýshyǵa sáttilik tileımin, — dedi mınıstr.
Sóz barysynda doktor Chýngvon Choý myrza Altaı Odaǵy chempıonatynyń tarıhı mánine toqtaldy.
-Búgin biz tarıh jasap jatyrmyz. Altaı Odaǵy dostyq, yntymaqtastyq jáne birlik maqsatynda quryldy. Bul bastama tek shekaralarymyzdy ǵana emes, mádenıetterimiz ben bolashaq urpaqtarymyzdy da bir arnaǵa toǵystyrady. Osy sátti paıdalanyp, jankúıerlerge alǵysymdy bildiremin. Sportshylar men tóreshilerge sáttilik tileımin, — dedi.
Federatsııa Prezıdenti Kýdrát Shamıev jarystyń otandyq taekvondo úshin mańyzy zor ekenin aıtty.
«Altaı Odaǵy chempıonatynyń alǵash ret Qazaqstanda ótýi — biz úshin úlken mártebe. Bul týrnır baýyrlas elder arasyndaǵy sporttyq baılanysty kúsheıtip, sportshylarymyzǵa halyqaralyq deńgeıde tájirıbe jınaýǵa múmkindik beredi. Chempıonatqa qatysyp jatqan barlyq komandaǵa sáttilik tileımin», — dedi Kýdrát Shamıev.
Іs-sharada Dúnıejúzilik taekvondo federatsııasynyń resmı Demo Team komandasy óner kórsetti. Álemniń túrli sahnalarynda shyǵys jekpe-jegin tanytyp júrgen komanda kórermenderge sporttyq sheberlik pen sahnalyq qoıylymdy ushtastyrǵan áserli baǵdarlama usyndy.
Sondaı-aq merekelik jıynda taekvondoǵa arnalǵan tolyq metrajdy kórkem fılmniń tızeri tanystyryldy. El tarıhynda alǵash ret túsirilgen bul kınotýyndy Qazaqstan taekvondo federatsııasynyń qoldaýymen júzege asqan. Fılm Qazaqstan men Koreıada túsirilip, qazan aıynda kórermenge jol tartady.
Aıta keteıik, 22–23 maýsym kúnderi Astanada alǵash ret taekvondodan Altaı Odaǵy chempıonaty ótedi. Jastar men eresekter arasynda uıymdastyrylatyn týrnır Dúnıejúzilik taekvondo federatsııasynyń World Taekwondo resmı kúntizbesine engen. Halyqaralyq dodaǵa Ázerbaıjan, Qyrǵyzstan, Mońǵolııa, Koreıa, Reseı, Túrkııa, Ózbekstan jáne Qazaqstan quramalary qatysyp jatyr.
Osyǵan deıin Qazaqstan 10 memlekettiń basyn qosyp taekvondo lıgasyn quratyny týraly jazdyq.
