Elordada tabıǵatty aıalaýǵa baǵyttalǵan eko-chellendj bastaldy
ASTANA. KAZINFORM – Elordada «Taza Qazaqstan» respýblıkalyq ekologııalyq aktsııasy aıasynda, sondaı-aq Dúnıejúzilik qorshaǵan ortany qorǵaý kúni men Ekolog kúnine oraı mádenıet, sport, bilim berý salalarynyń ókilderi, jastar jáne jastar uıymdary «Ózińnen basta!» chellendjine qatysty, dep habarlaıdy elorda ákimdiginiń resmı saıty.
Chellendjdiń negizgi maqsaty – qorshaǵan ortaǵa qurmetpen qaraýdy nasıhattaý jáne ekologııa máselelerine qoǵam nazaryn aýdartý.
Qatysýshylar áleýmettik jelidegi paraqshalarynda halyqqa úndeý joldap, ár azamatty qorshaǵan ortany taza ustaýǵa jáne tabıǵatty aıalaýǵa óz úlesin qosýǵa shaqyrdy.
– Men ekologııany jáne «Ózińnen basta» ekologııalyq chellendjin qoldaımyn. Ózimnen bastaımyn jáne ár adamdy tabıǵı resýrstarǵa jáne qorshaǵan ortaǵa uqypty qaraýǵa shaqyramyn, - dedi «Jer ambassadorlary» jastar qozǵalysynyń ókili.
Ekologııalyq is-sharalar aıasynda «Ózińnen basta» chellendji elordanyń jazǵy lagerlerinde de ótip jatyr. Balalarǵa arnalǵan taqyryptyq kezdesýler uıymdastyrylyp, tabıǵatty aıalaý men qorshaǵan ortany qorǵaýdyń mańyzy túsindirildi.
Olarǵa ekologııaǵa qamqorlyq ár adamnyń jeke úlgisinen bastalatyny, kúndelikti ádetter – tazalyq saqtaý, resýrstardy únemdeý jáne jaýapkershilikpen qaraý arqyly qalyptasatyny aıtyldy.
Chellendjge qatysýshylar «Taza Qazaqstan» aktsııasy bir rettik shara emes, ár azamattyń kúndelikti ómir saltyna aınalýy tıis ekenin atap ótti. Tek birlesken kúsh-jiger arqyly ǵana qorshaǵan ortany saqtap, bolashaq urpaq úshin qolaıly jaǵdaı jasaýǵa bolatyny aıtyldy.
Buǵan deıin Májilis ekologııa máseleleri boıynsha zań jobasyn maquldaǵanyn habarlaǵanbyz.
