Elordada syrtqy jarnama ornatý talaptary jeńildedi
NUR-SULTAN. QazAqparat - Elordanyń sáýlet, qala qurysy jáne jer qatynastary basqarmasy syrtqy jarnamany kelisý erejesine qatysty jańalyqtarymen bólisti, dep habarlaıdy QazAqparat tilshisi.
«2019 jyldyń 11 sáýirinen bastap Qazaqstan Respýblıkasynyń jarnama máseleleri jónindegi zańnamalyq aktilerine túzetýler engizilgen. Endigi ýaqytta protsedýra jeńildedi. Mańdaısha jazýlar kelisilmeıdi, al jarnamaǵa ruqsat berý júıesi habarlandyrý tártibine aýystyryldy (myna mekenjaı boıynsha júginýge bolady: Nur-Sultan qalasy Áýezov kóshesi, 6, úshinshi tereze +7 (7172) 55-72-25)» delingen atalǵan vedomstvonyń baspasóz qyzmeti taratqan aqparatta.
Habarlandyrý syrtqy (vızýaldy) jarnama nysandaryna arnalǵan syrtqy jarnama ornatylatyn kúnnen keminde 5 jumys kúni buryn jiberiledi.
Habarlandyrýda mynadaı málimetter bolady: syrtqy jarnama ornalastyratyn orny men merzimi týraly aqparattardy qamtıtyn málimetter formasy; Salyq kodeksine sáıkes, syrtqy jarnamany ornalastyrýǵa alǵashqy aıǵa tólem jasalǵanyn dáleldeıtin qujat; jarnama nobaıy, qazaq jáne orys tilindegi sıpattamasy.
Syrtqy jarnama ornalastyrý tóleminiń stavkasy Salyq kodeksiniń 605-babymen belgilengen.
Buǵan deıin kásipkerler óz mekemesiniń aldyna mańdaısha jazýyn ilý úshin elordanyń sáýlet, qala qurysy jáne jer qatynastary basqarmasymen kelisip, arnaıy ruqsat alýy tıis bolatyn.
