Elordada sýretshi Ǵ. Qarjasovtyń «Kóńil pernesi» atty jeke kórmesi ashyldy

Ekspozıtsııada sýretshiniń 45-ke jýyq kórkem týyndysy usynylǵan. Ǵalym Qarjasov 1954 jyly Pavlodar oblysy Ertis aýdany Úlgili aýylynda dúnıege kelgen. Ol  1980 jyly Almaty qalasynda N. Gogol atyndaǵy kórkemsýret ýchılışesin támamdaǵan. Ǵ. Qarjasovtyń týyndylary Nıý-Iork, Varshava, Vrotslav, Berlın, Amsterdam, Shtýtgard jáne Mıýnhen murajaılarynda saqtaýly. Sýretshiniń jeke kórmeleri Pavlodar, Qaraǵandy, Almaty, Omby, Sankt-Peterbor, Astana qalalarynda ótkizildi.

Qylqalam sheberiniń avtorlyq mánerine keneptiń órnektiligi tán. Onyń matalarynda tutas beıneler syıyp ketetindeı áser qaldyrady. Kelýshilerdiń kóz aldyna beıne bir qulpyrǵan tekemet nemese sándi shyǵys matasy tóselgendeı áser qaldyrady. Týyndylarda ótken zaman men qazirgi zamannyń adam beınesi utymdy somdalǵan. Ata-babalarymyzdyń beıneleri qorshaǵan ortamen óz úılesimin taýyp jatsa, óz kezeginde zamandastarymyzdyń túr-turpaty klassıkalyq eýropa óneriniń dástúrinde oryndalǵan.

«Bul kórmede usynylǵan týyndylarymda tarıhı taqyryptar, turmys-salt, týǵan aýyl, áıel beınesi, din, tabıǵat, batyrlar tulǵasy syndy túrli taqyryptar qamtylǵan. Meniń shyǵarmalarymnyń deni jazýshy Rollan Seısenbaev shyǵarmalarynyń motıvi boıynsha salyndy. Sońǵy bir jyl ishinde Astana jurtshylyǵyna shamamen úsh ret ózimniń jeke kórmemmen kelip otyrmyn», - deıdi sýretshi.